اسلام آباد: گلگت بلتستان کے سابق چیف جج رانا شمیم کا لندن سے اصل بیان حلفی منگوانے کیلئے اٹارنی جنرل آفس نے پاکستان ہائی کمیشن کو خط لکھ دیاہے۔
تفصیلات کے مطابق اٹارنی جنرل آفس نے پاکستان ہائی کمیشن کو خط اسلام آباد ہائیکورٹ کے احکامات کی روشنی میں لکھاہے ، خط کی کاپی رانا شمیم ، ایڈوکیٹ سپریم کورٹ لطیف آفریدی سمیت سیکریٹری وزارت خارجہ اسلام آباد کو بھی ارسال کی گئی ہے۔
خط میں کہا گیاہے کہ اصل بیان حلفی وزارت خارجہ کے ذریعے جلد عدالت میں پیش کیاجائے، بیان حلفی کی کاپی نمائندے کےسامنے دستخط کرا کر محفوظ کی جائے، کسی ابہام سے بچنے کیلئےحلف نامےکی کاپی سربمہر لفافے میں دی جائے، پاکستانی ہائی کمیشن حلف نامہ وزارت خارجہ کے ذریعےرجسٹرارہائیکورٹ کوبھیجےگا۔
یہ بھی پڑھیں: اسلام آباد ہائی کورٹ کا رانا شمیم کو اصلی حلف نامہ اور شوکاز نوٹس کا جواب جمع کرانے کا حکم
واضح رہے کہ اسلام آباد ہائی کورٹ نے رانا شمیم کو اصلی حلف نامہ اور شوکاز نوٹس کا جواب جمع کرانے کا کا حکم دے رکھا ہے۔
گذشتہ دنوں ہونے والی سماعت پر چیف جسٹس اسلام آباد ہائی کورٹ نے ریمارکس دیئے تھے کہ دیکھنا ہوگا رانا شمیم اور اخبار میں آنیوالاحلف نامہ مختلف ہے یا نہیں، حلف نامہ مختلف ہے تو اخبار کے اوپر بہت سنجیدہ سوالات کھڑے ہو جائیں گے۔
اسلام آباد ہائی کورٹ میں سابق چیف جج راناشمیم بیان حلفی کیس میں توہین عدالت کی سماعت 7دسمبر کو ہوگی۔
