نیویارک: دن بدن مصروف ہوتی زندگی میں کتاب پڑھنا ایک عیاشی کی صورت اختیار کرتا جارہا ہے جو فرصت کی طلبگار ہو۔ ماہرین کا کہنا ہے کہ نئے دور کے چلن کو دیکھتے ہوئے آئندہ آنے والا وقت آڈیو بکس یعنی صوتی کتابوں کا ہے جن کی فروخت میں اضافہ ہورہا ہے۔
امریکا میں آڈیو بک اسٹور مک ملن آڈیو کے صدر میری بیتھ روچ کا کہنا ہے کہ ان کے اسٹور سے آڈیو بکس لے جانے والے افراد نے اسے ملٹی ٹاسکنگ ٹول قرار دیا۔ یعنی وہ کوئی کام کرتے ہوئے بیک وقت کتاب کو سن بھی سکتے ہیں۔
انہوں نے کہا کہ آج کے دور میں جب کمپیوٹر اور مختلف اسکرینوں پر کام کرنا وقت کی اہم ضرورت بن چکا ہے، کتاب کو سننا ہی نئی کتابوں سے واقفیت اور معلومات حاصل کرنے کا بہترین ذریعہ ہے۔
مطالعے کے اس رجحان کو دیکھتے ہوئے امریکا میں اب کئی پبلشرز کتاب کو چھاپنے کے ساتھ اسے صوتی شکل میں پیش کرنے پر بھی غور کر رہے ہیں۔
روچ کا کہنا ہے کہ لوگ ان آڈیو بکس کو شاپنگ کرتے، جاگنگ یا ورزش کرتے، گھر میں مختلف امور سر انجام دیتے یا کار میں سفر کے دوران سنتے ہیں۔
آڈیو بکس اس مقصد کے لیے بنائی جانے والی ایپس کے ذریعے اسمارٹ فونز میں ڈاؤن لوڈ کی جاسکتی ہیں۔
