نئی دہلی: بھارت میں ایک جانب کرونا ویکسین کی قلت ہے تو دوسری جانب ویکسین کی فروخت کا مکروہ دھندہ بے نقاب ہوگیا ہے۔
بھارتی میڈیا رپورٹ کے مطابق مہاراشٹر کے اورنگ آباد شہر میں کرونا ویکسین کی فروخت کا دھندہ بے نقاب ہوا ہے، والوج پولیس نے واقعے پر فوری کارروائی کرتے ہوئے پرائمری ہیلتھ سینٹر کے ملازم کو ٹیکے فروخت کرتے ہوئے گرفتار کرلیا ہے، مذکورہ شخص تین سو روپے کے عوض میں کرونا کا ٹیکہ فروخت کرتا تھا۔
مقامی پولیس کا کہنا ہے کہ میونسپل کارپوریشن کے ہیلتھ سینٹر سمیت ضلع پریشد کے ہیلتھ سینٹر پر کرونا وبا سے بچاؤ کے مفت میں ٹیکے لگائے جارہے ہیں، اس کے باوجود طبی عملے کا ایک ملازم اس مذموم دھندے میں ملوث رہا، جو کہ فی ڈوز تین سو روپے میں فروخت کررہا تھا۔
واقعے کے بعد پولیس نے ملزم کو گرفتار کرتے ہوئے ملزم سے کرونا ویکسین اور نقدی رقم برآمد کرلی ہے، ملزم کا تعلق چونکہ ہیلتھ سینٹر سے ہے اس لیے کارپوریشن کے اعلیٰ حکام آگاہ کردیا گیا ہے تاکہ محکمانہ کارروائی عمل میں لائی جاسکے، پولیس نے واقعے میں مزید ملزمان کے ملوث ہونے کا خدشہ ظاہر کرتے ہوئے مزید تحقیقات کا آغاز کردیا ہے۔
