دبئی: ٹی 20 ورلڈ کپ کے سپر 12 مرحلے کے میچ میں آسٹریلیا نے بنگلہ دیش کو 8 وکٹوں سے شکست دے دی، ایڈم زمپا کو پانچ وکٹیں حاصل کرنے پر میچ کا بہترین کھلاڑی قرار دیا گیا۔
تفصیلات کے مطابق دبئی میں کھیلے جانے والے میچ میں آسٹریلیا نے بنگلہ دیش کی جانب سے دیا جانے والا 74 رنز کا ہدف 7ویں اوور میں پورا کرلیا۔
آسٹریلوی کپتان ایرون فنچ نے 40 رنز کی ذمہ دارانہ اننگز کھیلی، ڈیوڈ وارنر 18 رنز بنا کر آؤٹ ہوئے، مچل مارش 16 رنز کے ساتھ ناٹ آؤٹ رہے۔
بنگلہ دیش کی جانب سے تسکین احمد اور شریف الاسلام نے ایک، ایک وکٹ حاصل کی۔
اس سے قبل بنگلہ دیش کی ٹیم 15 اوورز میں 73 رنز پر ڈھیر ہوگئی تھی، بنگلہ دیش کے 8 کھلاڑی ڈبل فگر میں بھی داخل نہ ہوسکے۔
شمیم حسین 19، محمد نعیم 17 رنز بنا کر پویلین لوٹ گئے، کپتان محمود اللہ 16 رنز بناسکے۔
آسٹریلیا کی جانب سے ایڈم زمپا نے تباہ کن بولنگ کرتے ہوئے 5 کھلاڑیوں کو پویلین کی راہ دکھائی، جوش ہیزل ووڈ اور مچل اسٹارک نے دو، دو وکٹیں حاصل کیں۔
آسٹریلیا نے بنگلہ دیش کے خلاف کامیابی کے ساتھ جنوبی افریقہ کو پیچھے چھوڑتے ہوئے پوائنٹس ٹیبل پر دوسری پوزیشن حاصل کرلی۔
