سڈنی : آسٹریلیا کے مشرقی ساحلی علاقوں میں شدید سمندری طوفان سے تین افراد ہلاک اور درجنوں افراد لاپتہ ہے جبکہ امریکہ میں طوفان اور سیلاب نے درجنوں افراد کو بے گھرکردیا، ٹیکساس کے کئی علاقے سیلاب میں ڈوب گئے۔
آسٹریلیا کے مشرقی ساحلی علاقوں میں طوفانی بارشوں اور سیلاب نے تباہی مچادی، مشرقی ساحلی علاقے نیو ساؤتھ ویلز، وکٹوریہ اور تسمانیہ میں طوفانی بارشوں نے درجنوں افراد کو بے گھر کردیا، ساؤتھ ویلز میں چھیاسی ہزار مکانوں کو بجلی کی سپلائی منقطع ہوگئی۔
سڈنی کے ساحلی علاقوں میں درجنوں گھر خالی کرا لئے گئے جبکہ متعدد گھروں کو شدید نقصان پہنچا ہے، تین افرادکے ہلاک ہونے کی تصدیق کردی گئی ہے۔
دوسری جانب امریکی ریاست ٹیکساس میں بھی سیلاب نے سیکڑوں افراد کو منتقلی پر مجبور کردیا، درجنوں مکانات اور گاڑیاں سیلاب میں ڈوب گئے، سیلابی پانی میں پھنسے افراد کو نکالنے کا کام جاری ہے۔
وسطی فرانس میں شدید بارشوں کے بعد سیلاب نے معمولات زندگی درہم بر ہم کر دیئے ہیں، دارالحکومت پیرس میں بھی سیلابی پانی نے تباہی مچائی، سیلاب کی وجہ سے پونے دو لاکھ شہری محفوظ مقامات پر منتقل ہو گئے جبکہ تیرہ ہزار گھروں کو بجلی کی سہولت میسر نہیں ۔ فرانس نے مزید بارشوں کے پیش نظر بیس سے زائد علاقوں میں الرٹ جاری کیا ہے۔