کینبرا : آسٹریلیا میں طوفانی بارشوں کیساتھ آسمان سے گیند جتنے بڑے اولے گرے، بال کے سائز کے اولوں سے گاڑیوں کے شیشے ٹوٹ گئے جبکہ پارلیمنٹ کی بلڈنگ بھی متاثر ہوئی۔
تفصیلات کے مطابق آسٹریلیا میں آگ کے بعد طوفانی بارشوں نے تباہی مچادی ، آسٹریلوی دارالحکومت کے کینبرا میں طوفانی بارش کے ساتھ آسمان سے گیند جتنے بڑے اولے پڑے، جن سے گاڑیوں کے شیشے ٹوٹ گئے جبکہ پارلیمنٹ کی بلڈنگ بھی متاثر ہوئیں۔
کئی مقامات پر معمولات زندگی میں مصروف شہریوں نے خوفزدہ ہو کر گاڑیوں سے نکل کر شیڈز کے نیچے پناہ لی۔
آسٹریلوی خبر رساں اداروں کی جاری کردہ ویڈیوز اور تصاویر میں دکھایا گیا کہ گیند جتنے اولے آسٹریلوی پارلیمنٹ کی عمارت کو ڈھانپے ہوئے ہیں اور گھروں و گاڑیوں کے شیشے ٹوٹے ہوئے ہیں جبکہ لوگوں کو بھاری اولوں سے بچنے کے لیے بھاگتے ہوئے بھی دیکھا گیا۔
محکمہ موسمیات کا کہنا ہے کہ دارالحکومت کینبرا میں خوف پھیلانے کے بعد طوفانی بارش اور بھاری اولے دیگر شہروں کا رخ کر رہے ہیں اور ملک کے جنوب مشرقی ساحلی علاقے تیز ہوا کے ساتھ سمندری طوفان سے متاثر ہو سکتے ہیں، شہری احتیاطی تدابیر اختیار کریں۔
واضح رہے کہ آسٹریلیا کی ریاست وکٹوریا کے جنگلات میں لگنے والی آگ نے لاکھوں ایکڑ کو جلا کر راکھ کر دیا ہے۔ آگ سے ریسکیو کارکنوں سمیت 25 سے زائد افراد ہلاک ہوئے جبکہ ایک اندازے کے مطابق کروڑوں جنگلی جانور بھی ہلاک ہوئے۔
