کینبیرا: آسٹریلیا میں بڑھتے ہوئے درجہ حرارت کی وجہ سے زیر زمین رہنے والے کیڑوں اور جانوروں نے ٹھنڈے مقامات کی تلاش شروع کردی۔
تفصیلات کے مطابق آسٹریلیا اس وقت موسمیاتی تغیراتی تبدیلیوں کی لپیٹ میں ہے جس کی وجہ سے وہاں امسال موسم سرما کا آغاز ابھی تک نہیں ہوسکا بلکہ وہاں پر ان دنوں سورج آگ بھی برسا رہا ہے۔
آسٹریلیا کے جنوبی شہر کوئنز آئس لینڈ میں واقع سن شائن کوسٹ کے ایک گھر میں بن بلائے مہمان نے سب کو خوفزدہ کردیا، رپورٹ کے مطابق واقعہ پیر کی صبح اُس وقت پیش آیا جب گھر کی خاتون غسل خانے کی طرف گئیں۔
مزید پڑھیں: کمرے سے خطرناک زہریلا سانپ برآمد
خاتون نے دیکھا کہ وہاں پر 7 فٹ سے لمبا اژدہا موجود ہے جو غسل خانے کے دورازے اور کنڈی سے چمٹا ہوا ہے، انہوں نے شور مچانا شروع کیا تو گھر میں افراتفری مچ گئی جس کے بعد تمام لوگوں نے اژدہے کو دیکھا اور پیچھے ہٹنے میں ہی عافیت سمجھی۔
اہل خانہ نے سانپ پکڑنے والے لوک ہنٹلی نامی شخص کو کال کی اور تمام معاملے سے آگاہ کیا جس کے بعد وہ فوری طور پر ضروری سامان کے ہمراہ مذکورہ گھر پہنچے۔
لوک ہنٹلی نے سانپ پکڑنے سے پہلے اپنے موبائل کا کیمرہ کھولا اور ویڈیو بنائی جس میں دیکھا جاسکتا ہے کہ انہوں نے آسانی سے اژدہے کو پکڑ کر تھیلے میں بند کیا۔
سانپ پکڑنے والے نوجوان کا کہنا تھا کہ ’یہ خشکی کے سانپ ہیں جو گرمی بالکل برداشت نہیں کرتے اور انہیں ٹھنڈے مقامات کی تلاش رہتی ہے، آسٹریلیا کے درجہ حرارت میں اضافے کی وجہ سے مستقبل میں بھی اس طرح کے واقعات دیکھنے کو ملیں گے‘۔
یہ بھی پڑھیں: بھارتی شخص نے زندہ سانپ کا سر چبا ڈالا
ویڈیو شیئر کرنے کے بعد سوشل میڈیا صارفین نے اس کو جعلی اور ڈرامہ قرار دیتے ہوئے کہا کہ ’لوک ہنٹلی اپنی مشہوری کے لیے اس طرح کے اقدامات کررہے ہیں‘۔
