لاہور: گورنر پنجاب چوہدری محمد سرور نے خواتین کے خلاف جرائم کی روک تھام کے لیے آگاہی مہم چلانے کا فیصلہ کرتے ہوئے کہا کہ مجرموں کے مقدمات کا فیصلہ زیادہ سے زیادہ 6 ماہ میں ہونا چاہیئے۔
تفصیلات کے مطابق ارکان اسمبلی پروین سرور اور عظمیٰ کاردار کی گورنر پنجاب چوہدری سرور سے ملاقات ہوئی، ملاقات میں خواتین پر تشدد اور جنسی ہراسانی کے واقعات کا معاملہ موضوع گفتگو رہا۔
گورنر پنجاب نے خواتین کے خلاف جرائم کی روک تھام کے لیے آگاہی مہم چلانے کا فیصلہ کیا ہے، گورنر پنجاب کا کہنا تھا کہ مجرموں کے مقدمات کا فیصلہ زیادہ سے زیادہ 6 ماہ میں ہونا چاہیئے۔
چوہدری محمد سرور کا کہنا تھا کہ مجرموں کو آئین و قانون کے مطابق نشان عبرت بنانا ہوگا، خواتین کا تحفظ حکومتی اداروں کی ذمہ داری ہے۔
انہوں نے مزید کہا کہ پاکستان کی ترقی میں خواتین کے کردار کو نظر انداز نہیں کیا جا سکتا۔
