The news is by your side.

Advertisement

‘بھارتی میڈیا نے میرے ابھی نندن سے متعلق بیان کو توڑ مروڑ کر پیش کیا’

اسلام آباد : مسلم لیگ ن کے رہنما ایازصادق کا کہنا ہے کہ بھارتی میڈیا نے میرے ابھی نندن سے متعلق بیان کو توڑ مروڑ کر پیش کیا ۔

تفصیلات کے مطابق مسلم لیگ ن کے رہنما ایازصادق نے گزشتہ روز پارلیمنٹ میں ابھی نندن سے متعلق بیان پر وضاحت دیتے ہوئے کہا بھارتی میڈیا نے میرے بیان کو توڑ مروڑ کر پیش کیا اور میرے بیان کو تبدیل کرکے پیش کرنے کی کوشش کی۔

ایازصادق کا کہنا تھا کہ ابھی نندن مٹھائی باٹنے نہیں بلکہ پاکستان پر حملہ کرنے آیا تھا، ابھی نندن کے جہاز کو گرانا پاکستان کی فتح تھی۔

ن لیگی رہنما نے کہا کہ پارلیمنٹری لیڈرز کی وزیراعظم سے ملاقات تھی مگر وزیرخارجہ کو بھیج دیا، حکومت کس سے ڈکٹیشن لے رہی تھی کیا دباؤ تھا، ہم سے شیئرکرنا مناسب نہ سمجھا۔

ان کا کہنا تھا کہ وزیراعظم نے وزیرخارجہ کے ذریعے پیغام بھیجاابھی نندن کوریلیزکررہےہیں، وزیراعظم نے کیوں اپوزیشن کا سامنا نہیں کیا یہ وہ خود جانتے ہیں، وزیراعظم کا یہ فیصلہ سراسر غلط تھا۔

ایازصادق نے مزید کہا کہ نیشنل انٹرسٹ کیلئے سول لیڈرشپ کے فیصلے سے اپوزیشن متفق نہیں تھی ، ابھی نندن کو دینے کی کوئی جلدی نہیں تھی ذرا انتظار کرلیتے ، جو فیصلہ وزیراعظم نے کیا اس میں سول لیڈر شپ کمزور نظرآئی۔

اپنے لیڈر کی کرپشن بچانےکیلئے ایازصادق کاجھوٹ بھارتی میڈیا نے پکڑ لیا، شہباز گل


دوسری جانب معاون خصوصی ڈاکٹر شہباز گل نے بیان پر ردعمل دیتے ہوئے کہا ایازصادق کس حد تک گر گئے ہیں انھیں شرم آنی چاہیے، یہ وہی ایازصادق ہیں جو دھاندلی سے جیت کر اسپیکر بنے بیٹھےرہے۔

ڈاکٹر شہباز گل کا کہنا تھا کہ ن لیگ کے بہت سارے ممبران نوازشریف کابیانیے کیساتھ نہیں ہیں، ایازصادق کیا پرائم منسٹر ہیں یا حکومت میں ہیں جو فیصلے کریں گے ، فیصلہ حکومت کا ہوتاہے،غیر ذمہ دارانہ بیانات سے گریز کرنا چاہیے،شہبازگل

انھوں نے مزید کہا ابھی نندن کو واپس بھیجنے سے متعلق فیصلہ حکومت وقت کی ذمہ داری ہے، اپنے لیڈر کی کرپشن بچانےکیلئے ایازصادق کاجھوٹ بھارتی میڈیا نے پکڑ لیا۔

معاون خصوصی کا کہنا تھا کہ ویراعظم عمران خان امن چاہتے تھے اس لئے یہ فیصلہ کیا ، حکومت نے مودی کی جنگ کی سوچ سے بچنے کیلئے یہ قدم اٹھایا ، اس شخص کی بیمار اور گھٹیا سوچ کا کیا جواب دوں، اپوزیشن جماعتوں کو کبھی بھی اس حد تک گرتے نہیں دیکھا، ایازصادق نے افسوسناک حرکت کی ان کا علاج کرنے کی ضرورت ہے۔

Comments

یہ بھی پڑھیں