مظفر آباد: آزاد کشمیر الیکشن میں تحریک انصاف کے سونامی نے بڑے بڑے سیاسی برج الٹ دیئے، متعدد لیگی وزرا کو اپنے سیٹوں سے ہاتھ دھونا پڑا ہے۔
تفصیلات کے مطابق غیر حتمی وغیر سرکاری نتائج کے مطابق حلقہ ایل اے پندرہ باغ میں تحریک انصاف کے امیدوار سردار تنویر الیاس نے لیگی وزیر مشتاق منہاس کو شکست سے دوچار کردیا، پی ٹی آئی کے تنویر الیاس 19825ووٹ لے کر کامیاب قرار پائے۔
تحریک انصاف کےمرکزی رہنما بیرسٹر سلطان محمود چوہدری نے ایل اے تین میرپور پر لیگی وزیرچوہدری محمد سعید کو پچھاڑا، غیر سرکاری وغیر حتمی نتائج کے مطابق پی ٹی آئی کے سلطان محمود چوہدری 18462 ووٹوں سے کامیاب ہوگئے جبکہ پاکستان مسلم لیگ ن کے چوہدری محمد سعید 15343 ووٹ لے سکے۔
اسی طرح ایل اے ون میرپور پر تحریک انصاف کے اظہر صادق نے لیگی وزیر چوہدری مسعود خالد کو شکست سے دوچار کیا، غیرسرکاری نتائج کے مطابق تحریک انصاف کے اظہر صادق 14233 ووٹ لے کر کامیاب ہوئے مسلم لیگ ن کے چوہدری مسعود خالد نے 4609 ووٹ حاصل کرسکے۔
یہ بھی پڑھیں: آزاد کشمیر الیکشن، پی ٹی آئی نے سادہ اکثریت حاصل کرلی
ایل اے چار میرپورپر تحریک انصاف کے چوہدری ارشد نےبھی نوازلیگ کے سابق وزیر چوہدری رخسار کوہرایا۔
دوسری جانب لیگی نائب صدر مریم نواز نے آزاد کشمیر الیکشن کے نتائج کو ماننے سے انکار کردیا ہے، مریم نواز کا کہنا تھا کہ نتائج تسلیم نہیں کیےنہ کروں گی، میں نے تو دوہزار اٹھارہ کےالیکشن کے نتائج بھی تسلیم نہیں کیے، اس جعلی حکومت کو نہیں مانا، ورکراور ووٹرز کوشاباش دی،بےشرم دھاندلی پر کیالائحہ عمل ہوگا؟ جماعت جلد فیصلہ کرے گی۔
