اسلام آباد : حکومتی مذاکراتی کمیٹی اور رہبر کمیٹی کی باضابطہ پہلی بیٹھک آج شام ہوگی۔ دونوں کمیٹیوں کے درمیان آزادی مارچ سے متعلق بات ہوگی، پرویز خٹک کا کہنا ہے کہ وزیراعظم کےاستعفیٰ کاسوال ہی پیدا نہیں ہوتا۔
تفصیلات کے مطابق جمعیت علمائے اسلام کے آزادی مارچ کے معاملے پر اپوزیشن اورحکومت کے اپنے اپنے اتحادیوں سے مسلسل رابطے ہیں اور ملاقاتوں کا سلسلہ بھی جاری ہے۔
حکومتی مذاکراتی کمیٹی اور رہبرکمیٹی کی آج پہلی مرتبہ باضابطہ بیٹھک ہوگی، دونوں کمیٹیاں شام 5 بجے ملاقات کرے گی ، دونوں کمیٹیوں کے ممبران کے مابین آزادی مارچ سےمتعلق بات ہوگی۔
دوسری جانب اپوزیشن کی رہبرکمیٹی کا اجلاس آج سہ پہر 4 بجے ہوگا، کنوینراکرم خان اپنی رہائش گاہ پر اجلاس کی صدارت کریں گے، فضل الرحمان نے مذاکرات کے لیے رہبرکمیٹی کو اختیار دے رکھا ہے۔
مزید پڑھیں : رہبر کمیٹی سے کل ملاقات ہے، وزیر اعظم کے استعفے پر بات نہیں کریں گے: پرویز خٹک
حکومتی کمیٹی کے سربراہ کا کہنا تھا کہ وزیراعظم کےاستعفیٰ کاسوال ہی پیدا نہیں ہوتا، آزادی مارچ کی مشروط اجازت عدالتی فیصلوں سے منسلک ہوگی۔
خیال رہے جے یوآئی نے 31اکتوبر کو اسلام آبادمیں داخلے کی انتظامیہ کو درخواست دےدی ہے ، اس سے پہلے انتظامیہ سے27 اکتوبر کیلئے اجازت مانگی گئی تھی۔
یاد رہے گذشتہ روز حکومتی مذاکرات کمیٹی کے سربراہ پرویز خٹک نےوزیر اعظم عمران خان سے ٹیلی فون پر رابطہ کیا تھا اوراپوزیشن سے اب تک کے ہونے والوں رابطوں سے آگاہ کیا، پرویز خٹک نے بتایا تھا کہ رہبر کمیٹی سے کل باقاعدہ مذاکرات کی پہلی نشست ہوگی، پرویز خٹک نے کل ہونے والے مذاکرات پر وزیراعظم سے مشاورت کی۔
بعد ازاں وزیر دفاع پرویز خٹک نے اتحادی جماعتوں کے رہنماوں جی ڈی اے کی رہنما فہمیدہ مرزا اور رہنما ایم کیو ایم کے وفد سے بھی ملاقات کی اور آزادی مارچ سے متعلق حکومتی حکمت عملی پر مشاورت کی۔
واضح رہے حکومت نے آزادی مارچ کی اجازت دینے کا فیصلہ کیا تھا جبکہ وزیراعظم نے کمیٹی کو اپوزیشن سےمذاکرات جاری رکھنے کی ہدایت کی تھی۔
