The news is by your side.

Advertisement

اظہرعلی کی ٹیسٹ ٹیم کی کپتانی، پی سی بی نے اہم بیان جاری کردیا

لاہور : پاکستان کرکٹ بورڈ (پی سی بی) نے واضح کیا ہے کہ قومی ٹیسٹ ٹیم کے کپتان اظہر علی کو قیادت سے ہٹانے کا کوئی منصوبہ زیر غور نہیں ہے۔

تفصیلات کے مطابق قومی ٹیسٹ کرکٹ ٹیم کے کپتان اظہر علی کو ٹیم کی کپتانی سے ہٹایا جا رہا ہے یا نہیں؟ اس حوالے سے پی سی بی نے واضح بیان جاری کردیا ہے۔

ذرائع کے مطابق پی سی بی حکام نے تصدیق کی ہے کہ اظہر علی کو قیادت سے ہٹائے جانے کی خبروں میں کوئی صداقت نہیں جبکہ وزیراعظم عمران خان نے حالیہ ملاقات کے دوران اس امر کا اظہار بھی کیا کہ اظہر علی طویل عرصے تک ٹیم کی قیادت کریں۔

واضح رہے کہ چند روز قبل یہ خبریں منظرعام پر آئی تھیں کہ وزیراعظم عمران خان اظہر علی کی کپتانی کے انداز سے ناخوش ہیں اور ان سے قیادت واپس لینے کا بات بھی کی تاہم پی سی بی نے ان خبروں کی تردید کر دی ہے۔

اظہر علی کو گزشتہ سال اکتوبر میں سابق کپتان سرفراز احمد کی جگہ ٹیسٹ ٹیم کی قیادت سونپی گئی تھی جس کے بعد قومی ٹیم کو آسٹریلیا اور انگلینڈ کے ہاتھوں سیریز میں شکست کا سامنا کرنا پڑا البتہ سری لنکا اور بنگلہ دیش کیخلاف کامیابی حاصل ہوئی۔

Comments

یہ بھی پڑھیں