بھارتی کرکٹ ٹیم کے سابق کپتان محمد اظہر الدین نے ویرات کوہلی کو آرام کرنے مشورہ دے دیا۔
بھارتی ٹیم کے سابق کپتان اور مایہ ناز بلے باز ویرات کوہلی کی فارم بحال نہ ہوسکی، انڈین پریمیئر لیگ میں وہ رائل چیلنجرز بنگلور کی نمائندگی کررہے ہیں لیکن ابھی تک وہ کوئی لمبی اننگز نہیں کھیل سکے ہیں۔
ویرات کوہلی لکھنؤ سپر جائنٹس کے خلاف میچ میں بغیر کوئی رن بنائے پویلین لوٹ گئے تھے تاہم بنگلور نے فاف ڈوپلیسی کی 96 رنز کی اننگز کی بدولت میچ جیت لیا اور ان کی ٹیم پوائنٹس ٹیبل پر دوسرے نمبر پر آگئی۔
سابق کپتان محمد اظہر الدین نے سماجی رابطے کی ویب سائٹ ٹویٹر پر لکھا کہ ’ویرات کوہلی کو کچھ میچز کے لیے وقفہ لینے کی ضرورت ہے، وہ بریک لینے کے بعد لمبی اننگز کھیل سکیں گے۔
Virat Kohli deserves a much needed break from some matches. A little rest should rejuvenate him.
— Mohammed Azharuddin (@azharflicks) April 23, 2022
اس سے قبل سابق کوچ روی شاستری نے کہا تھا کہ اگر کسی کو وقفے کی ضرورت ہے تو وہ ویرات کوہلی ہے اگر انہیں آرام نہیں دیا گیا تو ان کا بھیجا فرائی ہوجائے گا۔
ان کا کہنا تھا کہ چاہے مہینہ، دو مہینہ یا انگلینڈ کے دورے کے بعد ویرات کوہلی کو آرام دینے کی ضرورت ہے کیونکہ اس کی ابھی چھ سے سات سال کی کرکٹ باقی ہے۔
واضح رہے کہ بھارتی کرکٹ بورڈ کی جانب سے 33 سالہ کوہلی کو تینوں فارمیٹ کی کپتانی سے ہٹا کر روہت شرما کو قیادت سونپی گئی ہے، وہ تینوں فارمیٹ میں اپنے آخری 100 میچز میں سنچری اسکور کرنے میں ناکام رہے ہیں۔
