The news is by your side.

Advertisement

تحریک صوبہ ہزارہ کے قائد بابا حیدرزمان کی نماز جنازہ ادا کردی گئی

ایبٹ آباد : تحریک صوبہ ہزارہ کے قائد اور ہزارہ کے بزرگ سیاست دان بابا حیدر زمان کی نماز جنازہ ادا کردی گئی۔

تفصیلات کے مطابق خیبرپختونخواہ کے علاقے ہزارہ ڈویژن سے تعلق رکھنے والے بابا حیدرزمان کی نماز جنازہ کالج گراؤنڈ میں ادا کردی گئی۔

مرحوم کو نمازجنازہ کے بعد ان کے آبائی گاؤں دیوال می سپرد خاک کیا جائے گا۔

تحریک صوبہ ہزارہ کے قائد بابا حیدرزمان انتقال کر گئے

یاد رہے کہ گزشتہ روز تحریک صوبہ ہزارہ کے چیئرمین بابا حیدرزمان علالت کے باعث 84 سال کی عمر میں اسلام آباد کے نجی اسپتال میں انتقال کرگئے تھے۔

بابا حیدر زمان اسلام آباد کے نجی اسپتال میں گزشتہ کئی روز سے علالت کے باعث زیرعلاج تھے۔

تحریک صوبہ ہزارہ کے قائد بابا حیدر زمان 1934 میں ایبٹ آباد کے نواحی علاقے دیوال منال میں پیدا ہوئے۔ انہوں نے اپنی سیاسی جدوجہد کا آغاز 60 کی دہائی میں کیا۔ انہوں نے پہلا الیکشن 1962 میں جبکہ آخری الیکشن 2013 میں لڑا۔

بابا حیدر زمان 1977 میں جمہوریت کی بحالی کی تحریک ایم آر ڈی میں شامل ہوئے اور گرفتار بھی ہوئے۔ حیدر زمان صوبائی وزیر محنت و افرادی قوت، ضلع ناظم ایبٹ آباد اور چیئرمین ڈسٹرکٹ کونسل ایبٹ آباد رہے۔

انہوں نے سنہ 1990 اور 1993 میں سابق وزیر اعظم میاں نواز شریف کے مقابلے پر قومی اسمبلی کی نشست کی لیے الیکشن میں حصہ لیا۔

سنہ 2010 میں جب صوبہ سرحد کا نام تبدیل کرکے خیبر پختونخواہ رکھا گیا تو بابا حیدر زمان نے ہزارہ کو صوبہ بنانے کے لیے سیاست دانوں کو ایک چھتری تلے اکٹھا کیا۔

انہوں نے بھرپور انداز میں تحریک کا آغاز کیا جس کے باعث انہیں ملکی اور بین الاقوامی میڈیا میں بھی پذیرائی ملی۔

Comments

comments

یہ بھی پڑھیں