The news is by your side.

Advertisement

اسٹیل مل اور پی آئی اے کی لنڈا بازار میں سیل نہیں ہونے دینگے،بابراعوان

اسلام آباد : پاکستان تحریک انصاف کے رہنما بابراعوان کا کہنا ہے کہ حکومتی اداروں کو بیچنے کی کوشش کی گئی تو پی ٹی آئی راستہ روکے گی، اسٹیل مل اور پی آئی اے کی لنڈا بازار میں سیل نہیں ہونے دینگے۔

تفصیلات کے مطابق پاکستان تحریک انصاف کے رہنما بابراعوان نے میڈیا سے گفتگو کرتے ہوئے کہا کہ پی ٹی آئی کوموقع دینا چاہیے تاکہ اسٹیٹس کو ٹوٹ جائے، گلگت، آزاد کشمیر، پنجاب کی حکومت مسلم لیگ ن کے پاس ہے، مسلم لیگ ن فنڈزاستعمال نہیں کرنے دیتی۔

بابر اعوان کا کہنا تھا کہ عجیب بات ہےایک وزیرکہتا ہے پی آئی اے مفت دیں گے، کیا اب حکومتی اداروں کومفت بیچا جائےگا، حکومتی اداروں کوبیچنےکی کوشش کی گئی توپی ٹی آئی راستہ روکے گی، اسٹیل مل اورپی آئی اے کی لنڈا بازارمیں سیل نہیں ہونے دینگے۔

رہنما پی ٹی آئی نے کہا کہ خیبرپختونخوا میں کرپشن میں ملوث وزراکو سزائیں ملیں، سانحہ ماڈل ٹاؤن میں ملوث وزیر کو دوبارہ وزارت دے دی گئی، این اے 53 سے الیکشن لڑوں گا، ٹکٹ کیلئے درخواست دی ہے۔

انکا کہنا تھا کہ پی آئی اے کھربوں کے ادارے کے، مفت کیسے بیچا جاسکتا ہے، اداروں کوایک شہر کےحکمران فروخت کرنے جارہے ہیں، ایک حکمران تو نااہل ہوگیا، شہباز شریف بھی جلد نااہل ہوگا۔

خیال رہے کہ گذشتہ ماہ وفاقی کابینہ کمیٹی برائے نجکاری نے قومی ایئرلائنز پی آئی اے اور اسٹیل ملز کی نجکاری کا پلان منظور کرلیا تھا۔

وفاقی وزیر برائے نجکاری دانیال عزیز کا کہنا تھا کہ پی آئی اے کو نجکاری کیلئے دو حصوں میں کور اور نان کور بزنس میں تقسیم کیا جائے گا، کور بزنس کے49 فیصد حصص انتظامی قبضے کے ساتھ فروخت کئے جائیں گے جبکہ قومی ایئر لائن کے ذمے 300ارب روپے سے زائد کے بقایا جات غیر کور کمپنی کو منتقل کئے جائیں گے۔

وفاقی وزیر کا کہنا تھا کہ اسٹیل ملز کو 30 سال لیز پر دیا جائے گا جبکہ 180 ارب روپے سے زائد کے بقایا جات بھی حکومت اپنے کھاتے میں رکھے گی۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

Comments

comments

یہ بھی پڑھیں