پاکستان تحریک انصاف کے رہنما بابر اعوان نے کہا ہے کہ ملک میں احتساب کا جنازہ نکل چکا ہے 95 فیصد احتساب کے مقدمات ختم ہو گئے ہیں۔
اے آر وائی نیوز کے مطابق پی ٹی آئی رہنما بابر اعوان نے اسلام آباد میں پریس کانفرنس کرتے ہوئے کہا کہ کل ایسا واقعہ ہوا کہ پاکستان میں جو احتساب کا ادارہ تھا وہ فوت ہوگیا، پنجاب اور سندھ کے گھرانوں کو کس طرح فائدہ دیا گیا ہے، فضل الرحمان سمیت دیگر کیخلاف جو مقدمات تھے اس پر فاتحہ پڑھ لی گئی ہے، پی ڈی ایم کے وزیروں نے کہا تھا کہ ستمبر میں نوازشریف کو لائیں گے، پھر دوسرا بیان آیا کہ کیس پہلے ختم ہوں گے نواز شریف بعد میں آئیگا۔
پی ٹی آئی رہنما کا کہنا تھا کہ نیب ترامیم کے مطابق 99 لوگ لٹ جائیں گے تو انہیں لوٹنے والا لٹیرا نہیں ہوگا، 49 کروڑ 99 لاکھ 99 ہزار 999 روپے کی کرپشن کرنے والا کرپٹ نہیں ہوگا، یہاں ملزمان کو سزا نہیں ہوتی اور سالہا سال فرد جرم عائد نہیں ہوتے، لیکن نیب ترمیم کے بعد اگر کیس ثابت نہیں ہوا تو کیس کرنے والے کو 5 سال قید بامشقت سزا ہوگی، تو جو پیسے والا ہے اس کے خلاف اب کون مقدمہ بنائے گا؟
یہ بھی پڑھیں: قانون میں تبدیلی : شہباز، حمزہ، پرویز اور گیلانی کے نیب مقدمات ختم
بابر اعوان نے کہا کہ اس وقت معیشت کریش کر رہی ہے، کل سے پاکستان میں افراط زر ریڈ زون میں داخل ہوا ہے، کل اس کو آخری بوسٹر لگ گیا ہے، اب اسے ناقابل علاج بنایا جارہا ہے، مہنگائی آسمان پر تھی اب ساتویں آسمان پر جا رہی ہے۔
