پشاور زلمی کے کپتان بابراعظم نے ٹیم کی مجموعی کارکردگی پر اطمینان کا اظہار کرتے ہوئے کہا ہے کہ جیت کے تسلسل کو برقرار رکھنا ہدف ہے۔
کراچی میں پریس کانفرنس کرتے ہوئے بابراعظم نے کہا کہ پی ایس ایل کے موجودہ سیزن میں کھیلنے کا بہت مزہ آرہا ہے ٹیم کے تمام کھلاڑی ہر شعبے میں بھرپور محنت کر رہے ہیں اوپنرز اچھا اسٹارٹ دیں تو دیگر کھلاڑیوں کیلئے آسانی ہوتی ہے۔
انہوں نے کہا کہ ہر میچ میں بہترین کارکردگی دکھانے کی بھرپور کوشش ہے ماضی کی غلطیوں سے بہت کچھ سیکھنےکو ملا ہے ریڈبال کرکٹ دباؤ کو برداشت کرنا سکھاتی ہے جب کہ مختلف لیگز اور قوانین سےبہت کچھ سیکھنے کا تجربہ ملا۔
اب تک ایونٹ میں ناقابل شکست ٹیم کے کپتان بابراعظم کا کہنا تھا کہ گزشتہ 5میچز کی کارکردگی کے تسلسل کو برقرار رکھنا ہدف ہے ہر دن کنڈیشنز ایک جیسی نہیں ہوتیں، سمجھنا آسان نہیں ہوتا۔
انہوں نے کہا کہ ٹیم کی ضرورت کو مدنظر رکھ کر بیٹنگ کرنی پڑتی ہے بعض اوقات اسٹرائیک ریٹ کو برقرار رکھنا مشکل ہو جاتا ہے ہماری ٹیم ماڈرن کرکٹ کے تقاضوں سے فائدہ اٹھانا چاہتی ہے۔
علی حسن اے آروائی نیوز سے اسپورٹس رپورٹر کی حیثیت سے وابستہ ہیں اور کھیلوں کے معاملات میں گہری دلچسپی رکھتے ہیں