پاکستان کرکٹ ٹیم کے کپتان اور عالمی ریکارڈ پر ریکارڈ بنانے والے بابر اعظم آج نیوزی لینڈ کے خلاف پانچویں ون ڈے انٹرنیشنل میں ایک اور سنگ میل عبور کریں گے۔
اے آر وائی نیوز کے مطابق پاکستان کرکٹ ٹیم کے کپتان اور عالمی ریکارڈ پر ریکارڈ بنانے والے بابر اعظم آج نیوزی لینڈ کے خلاف پانچواں میچ کھیل کر ایک اور سنگ میل عبور کرلیں گے۔ قومی کپتان آج اپنا 100 واں انٹرنیشنل ون ڈے میچ کھیلیں گے۔
بابر اعظم نے اب تک 99 ویں ایک روزہ میچز کھیلے ہیں جس میں انہوں نے 5088 رنز بنا رکھے ہیں۔ قومی کپتان نے اس دوران 18 سنچریاں اور 26 نصف سنچریاں بھی اسکور کی ہیں۔
قومی کپتان عالمی ریکارڈ پر ریکارڈ بنائے جا رہے ہیں۔ گزشتہ روز انہوں نے ایک ہی اننگ میں دو عالمی ریکارڈ قائم کیے تھے۔ پہلے انہوں نے 96 ویں اننگ میں 5 ہزار رنز اسکور کرکے سب سے کم میچز میں 5 ہزار رنز بنانے کا سابق جنوبی افریقی بیٹر ہاشم آملہ کا ریکارڈ توڑا اس کے بعد اسی اننگ میں جب انہوں نے 18 ویں سنچری اسکور کی تو انہوں نے سب سے کم اننگز میں اتنی سنچریاں بنانے والے کھلاڑی ہونے کا اعزاز بھی حاصل کرلیا۔
پاکستان کے کپتان بابر اعظم نے تقریباً 8 سال قبل لاہور میں زمبابوے کے خلاف ون ڈے انٹرنیشنل میں پاکستان کے لیے ڈیبیو سے شاندار کیریئر کا آغاز کیا تھا اور آج وہ کرکٹ کے موجودہ دور کے کامیاب ترین بلے باز مانے جاتے ہیں۔
انہوں نے اپنے کیرئیر میں کئی ریکارڈز توڑے ہیں۔ وہ 2 اپریل 2022 سے آئی سی سی ون ڈے رینکنگ میں نمبر ون بلے باز رہے ہیں اور گزشتہ سال آئی سی سی مینز کرکٹر آف دی ایئر اور آئی سی سی مینز او ڈی آئی کرکٹر آف دی ایئر کے لیے سر گارفیلڈ سوبرز ٹرافی کے اپنے نام کرچکے ہیں۔
ان ہی کی قیادت میں گزشتہ میچ میں پاکستان نے نیوزی لینڈ کے خلاف مسلسل چوتھے میچ میں فتح حاصل کرکے تاریخ میں پہلی بار ون ڈے کی عالمی نمبر ایک ٹیم ہونے کا اعزاز حاصل کیا ہے۔
وہ پہلے بلے باز ہیں جنہیں ون ڈے کرکٹ میں سنچریز کی دو بار ہیٹ ٹرک کی ہے۔
انہوں نے اپنے کیریئر کے دوران دنیائے کرکٹ کے بڑے بڑے ناموں جن میں سابق ویسٹ انڈین کپتان سر ویوین رچرڈ، ہاشم آملہ، ویرات کوہلی سمیت کئی کھلاڑیوں کے ریکارڈ اپنے نام کیے ہیں۔
ان کی اسی بے مثال کارکردگی کے باعث سابق کپتان اور سابق پی سی بی چیئرمین رمیز راجا نے ان کا موازنہ ڈان بریڈ مین سے کیا ہے۔
رمیز راجا کا کہنا ہے بابر اعظم ڈان بریڈمین سے کم نہیں، وائٹ بال کرکٹ میں وہ اعدادوشمار کے لحاظ سے دنیا کے بہترین کھلاڑی بن چکے ہیں، میں نے اتنے خطرناک فارمیٹ میں کسی کھلاڑی کی اتنی مستقل مزاجی کبھی نہیں دیکھی جس کی بنیاد ان کی تکنیک اور مزاج ہے۔
