قومی ٹیم کے کپتان بابراعظم نے ناقدین کو جواب دیتے ہوئے کہا ہے کہ اچھا کرتے ہیں تب بھی تنقید ہوتی ہے لیکن ہم ایک دوسرے کو سپورٹ کرتے ہیں ہمارا کام پرفارمنس دینا ہے اور وہ ہم دینے کی کوشش کرتے ہیں۔
انگلینڈ کے خلاف دوسرے ٹی ٹوئنٹی میں سنچری بنا کر 200 رنز کا تاریخی ہدف حاصل کر کے فتح سمیٹنے کے بعد پریس کانفرنس کرتے ہوئے بابراعظم نے کہا کہ ذہن میں یہی تھاکہ ہدف حاصل کرسکتےہیں محمدرضوان کو کریڈٹ جاتاہے انہوں نےعمدہ بیٹنگ کی ہم نے جو پلان کیا اسے پر عملدرآمد کیا۔
بابراعظم کا کہنا تھا کہ ہم کون ہوتے ہیں کسی کو کچھ کہنے والے، تنقید کرنے والوں کا کام ہے وہ کرتے رہیں جب کارکردگی دکھائیں تب بھی تنقید ہوتی ہے اور جب پرفارمنس نہ ہو تو ہوتی رہتی ہے، کوشش ہوتی ہے اچھی پرفارمنس کریں اور یہی ہمارا کام ہے۔
کپتان نے کہا کہ صورتحال مشکل ضرور تھی تاہم بعد میں صورحال بہتر ہونے لگی انگلینڈ نےٹوٹل اچھا سیٹ کیا، کیچز ڈراپ ہوئے جس کی وجہ سے بڑا ہدف بن گیا۔
ان کا کہنا تھا کہ فینز ہمیشہ سپورٹ کرتے ہیں اونچ نیچ ہوتی ہے یہ کرکٹ ہے جس میں مداح سپورٹ کرتے ہیں پلیئرز آپس میں بھی ایک دوسرے کو سپورٹ کرتے ہیں ہماری کیمسٹری اچھی بن چکی ہے سب جانتے ہیں کہ کیا رول ادا کرنا ہے۔
