چلاس(29 نومبر 2025): وادیٔ کاغان کے ٹاؤن ناران کو چلاس سے ملانے والے بابوسر روڈ کو ہر قسم کی ٹریفک کے لیے بند کر دیا گیا ہے۔

ڈپٹی کمشنر (ڈی سی) دیامر کی جانب سے جاری کیے گئے نوٹیفکیشن کے مطابق بابوسر ناران شاہراہ ہر قسم کی ٹریفک کیلئے بند کردی گئی ہے، برفباری نے خطرناک اور پھسلن کی صورتحال پیدا کردی ہے۔

نوٹیفکیشن کے مطابق دیامر اور خیبرپختونخوا کی حدود میں سیکیورٹی کو واپس بلایا گیا ہے، تمام تر صورتحال کے پیش نظر بابو سر روڈ کو ہر قسم کی ٹریفک کیلئے بند کیا جاتا ہے۔

دوسری جانب شدید برفباری اور موسم کی خرابی کی وجہ سے بابوسر ٹاپ اور ملحقہ علاقوں (خیبر پختونخوا اور گلگت بلتستان) میں پھسلن اور خطرناک حالات پیدا ہو گئے ہیں، جس سے حادثات کا خطرہ بڑھ گیا ہے۔

مقامی انتظامیہ نے عوام کو سختی سے ہدایت کی ہے کہ وہ اس روڈ پر سفر کی کوشش نہ کریں تاکہ کسی جان یا مال کی ہلاکت سے بچا جا سکے۔ یہ موسم سرما کی پہلی برفباری کا نتیجہ ہے، جو ناران اور بابوسر ٹاپ جیسے پہاڑی علاقوں میں عام ہے۔