مناما : بحرین میں مسلح افراد نے جیل پر حملہ کرکے دس قیدیوں کو آزاد کرالیا، حملہ آوروں کی جانب سے فائرنگ کے نتیجے میں ایک جیل اہلکار ہلاک ہو گیا، مسلح افراد فرار ہونے میں کامیاب ہوگئے۔
تفصیلات کے مطابق بحرین میں مسلح افراد نے دارالحکومت کے قریب ایک جیل پر حملہ کرکے دہشت گردی کے جرم میں سزا پانے والے اپنے دس ساتھیوں کو رہا کرا لیا۔
بحرین کی وزات داخلہ کے مطابق دارالحکومت ماناما کی جیل پر مسلح افراد نے حملہ کیا اور دہشت گردی کے جرم میں سزا کاٹنے والے 10مجرمان کو آزاد کروالیا۔
حکام کے مطابق حملے کے بعد جیل کے قریبی علاقوں کا محاصرہ کر کے سرچنگ آپریشن جاری ہے۔ بین الاقوامی میڈیا کا کہنا ہے کہ اس جیل میں سیکیورٹی فورسز پرحملوں میں ملوث دہشت گردوں کو رکھا گیا تھا۔
یاد رہے کہ بحرین میں گزشتہ کئی سالوں سے جمہوریت کی بحالی کے لئے مظاہروں کو طاقت کے استعمال کا سامنا ہے۔
