مناما: بحرین میں ایک بڑے شاپنگ سینٹر کو ویکسی نیشن سینٹر میں تبدیل کردیا گیا ہے، بحرین میں 4 کرونا ویکسینز مفت لگائی جارہی ہیں۔
بین الاقوامی ویب سائٹ کے مطابق بحرین میں کرونا وائرس کی وجہ سے بڑے پیمانے پر خالی ہونے والے شاپنگ مال کو ویکسی نیشن سینٹر میں تبدیل کردیا گیا ہے تاکہ عوام کو وبا سے بچاؤ کی ویکسین لگائی جاسکے۔
بحرین کا ستارہ مال، سرکاری دفاتر تک رسائی کے لیے لوگوں کو اپنی جانب راغب کرتا تھا لیکن عالمی وبا کی وجہ سے وہ آؤٹ لیٹس بند ہوگئے اور ان کی سروسز اب ورچوئلی دستیاب ہیں۔
اس مال میں چند فاسٹ فوڈ آؤٹ لیٹس اور ایک سپر مارکیٹ کھلی ہونے کی وجہ سے بحرین کے صحت حکام نے اس شاپنگ مال کو ویکسی نیشن حب میں تبدیل کردیا۔
نئے ویکسین سینٹر میں عوامی صحت اور وبائی امراض کی ماہر بسمہ محمود نے کہا کہ ہر گھنٹے لوگوں کی بڑی تعداد یہاں آرہی ہے، اس سلسلے میں شاپنگ مال میں آنے والے افراد سماجی فاصلے کے ساتھ اپنی باری کا انتظار کرتے نظر آئے۔
بسمہ محمود نے کہا کہ یہ ویکسی نیشن سینٹر بحرین کی 50 فیصد سے زائد آبادی کو مکمل طور پر کرونا وائرس سے بچاؤ کی ویکسین کے حصول میں مدد دے گا۔
بحرین میں اس وقت کرونا وائرس سے بچاؤ کی 4 ویکسینز مفت دستیاب ہیں۔ ان میں فائزر، چین کی سائنو فارم، آکسفورڈ / ایسٹرا زینیکا ویکسین اور روس کی اسپٹنک ویکسین شامل ہیں۔
