اسلام آباد : بحرین جانے والے تمام غیرملکی مسافروں کو آگاہ کیا گیا ہے کہ منشیات اور خشخاش لے جانا سنگین جرم کے زمرے میں آتا ہے لہٰذا قانون سے لاعلمی گرفتاری اور روزگار سے محرومی کا سبب بن سکتی ہے۔
بیورو آف امیگریشن اینڈ اوورسیز ایمپلائمنٹ نے بحرین کیلیے سفر کرنے والے تمام پاکستانی شہریوں کے لیے اہم انتباہ جاری کرتے ہوئے کہا ہے کہ بحرین میں منشیات سے متعلق قوانین پر انتہائی سختی سے عمل درآمد کیا جاتا ہے۔
اعلامیے کے مطابق بحرین میں منشیات کے کنٹرول سے متعلق 1973 کے شاہی فرمان نمبر 4 نافذ العمل ہے، جس کے تحت افیون، اس کے اجزاء اور اس سے متعلقہ کسی بھی مواد کی کاشت، درآمد، برآمد یا اپنے پاس رکھنا سخت جرم تصور کیا جاتا ہے۔
حکام نے خبردار کیا ہے کہ عام مسافر اس بات کو یقینی بنائیں کہ ان کے سامان میں کوئی ممنوعہ شے موجود نہ ہو، کیونکہ پوست کے بیج یعنی خشخاش ساتھ لے جانا بھی بحرینی قانون کے تحت قابلِ سزا جرم ہے۔
اعلامیے میں کہا گیا ہے کہ قانون سے لاعلمی یا معمولی سی غفلت بھی فوری گرفتاری، سخت قانونی کارروائی اور مستقبل میں روزگار کے مواقع سے مستقل محرومی کا باعث بن سکتی ہے۔
اوورسیز پاکستانیوں اور دیگر مسافروں کو ہدایت کی گئی ہے کہ روانگی سے قبل ملک کے تمام قوانین کا تفصیلی جائزہ لیں اور کسی بھی ایسی شے سے مکمل اجتناب کریں جو بحرین کے قوانین کی خلاف ورزی کا سبب بن سکتی ہو۔
حکام کے مطابق بحرین کسٹمز نے ممنوعہ اور محدود اشیاء کی تفصیلی فہرست اپنی آفیشل ویب سائٹ پر جاری کر رکھی ہے، جہاں سے مسافر مستند معلومات حاصل کرسکتے ہیں۔ مزید معلومات کے لیے بحرین کسٹمز آفیشل ویب سائٹ پر بھی وزٹ کیا جاسکتا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں