اسلام آباد: انسداد دہشتگردی عدالت (اےٹی سی) نے پی ٹی آئی ایم این اے صالح محمد کی ضمانت منظور کر لی۔
نمائندہ اے آر وائی نیوز کے مطابق انسداد دہشت گردی عدالت کے جج راجہ جواد عباس حسن نے درخواست ضمانت پر فیصلہ سنا دیا۔
عدالت نے صالح محمد کی جانب سے ڈاکٹر بابر اعوان اور استغاثہ کے دلائل سننے کے بعد ضمانت منظور کرتے ہوئے ایک لاکھ روپے کے ضمانتی مچلکے جمع کرانے کا حکم دے دیا۔
اسلام آباد پولیس نے رکن اسمبلی صالح محمد کو گرفتار کیا تھا۔
صالح محمد خان کے ساتھ اسلام آباد پولیس نے تضحیک آمیز رویہ اختیار کیا۔ ان کے گلے میں تختی ڈال کر تصویر کھینچی گئی۔
رہنما تحریک انصاف علی محمد خان نے اے آر وائی نیوز سے خصوصی گفتگو میں کہا تھا کہ عوامی نمائندے کے ساتھ تضحیک آمیز رویہ رکھا گیا، صالح محمد خان کیا دہشت گرد تھے جو ایسا رویہ رکھا؟ حکومت میں مافیا بیٹھا ہے جو مخالفین کے خلاف ہر حد تک جاسکتا ہے۔