کورکی(5 اکتوبر 2025): بلوچستان کے بہادر عوام فتنہ الہندوستان کے سامنے آہنی دیوار بن گئے، مقامی قبائل بہادری کا مظاہرہ کرتے ہوئے اپنے علاقے کا دفاع کیا۔
ذرائع کے مطابق بلوچستان کے علاقے کورکی میں فتنہ الہندوستان کے دہشتگردوں نے پرامن شہریوں پر حملہ کیا، تاہم مقامی قبائل نے بہادری کا مظاہرہ کرتے ہوئے اپنے علاقے کا دفاع کیا، کورکی میں قبائل اور دہشتگردوں کے درمیان جھڑپ کے دوران 4 دہشتگرد ہلاک اور 2 زخمی ہوئے۔
ذرائع کا کہنا ہے کہ مقامی قبائل کے اصرار کے باوجود دہشتگردوں نے علاقہ خالی کرنے سے انکار کیا،کلی آدم زئی کور کی خواتین نے قرآن کا واسطہ دیکر دہشتگردوں کو جانے کیلئے بھی کہا لیکن دہشت گردوں نے کورکی میں مقامی خواتین کو مسلسل ہراساں کیا۔
ذرائع کا کہنا ہے کہ دہشتگردوں کے مذموم عزائم کے پیش نظر مقامی قبائل نے اپنے دفاع کا فیصلہ کیا، دہشتگردوں سے جھڑپ کے دوران مقامی قبیلے کا ایک فرد شہید اور 2 زخمی ہوئے۔
ذرائع کے مطابق کورکی کے قبائل نے عہد کیا وہ اپنے علاقے کو دہشتگردانہ سرگرمیوں میں استعمال نہیں ہونے دینگے، بلوچستان کے بہادر عوام پر فتنہ الہندوستان کا اصل چہرہ عیاں ہو چکا ہے، فتنہ الہندوستان کا اسلام اور بلوچ روایات سے کوئی تعلق نہیں ہے۔
لئیق الرحمن دفاعی اور عسکری امور سے متعلق خبروں کے لئے اے آروائی نیوز کے نمائندہ خصوصی ہیں