دبئی: پاکستان سپر لیگ (پی ایس ایل) میں اسلام آباد یونائیٹڈ کی نمائندگی کرنے والے ویسٹ انڈیز آل راؤنڈر آندرے رسل پر ڈوپنگ قوانین کی خلاف ورزی کے باعث ایک سال کے لیے کرکٹ کے دروازے بند ہوگئے۔
تفصیلات کے مطابق پی ایس ایل میں گزشتہ سال اسلام آباد یونائیٹڈ کی نمائندگی کرنے والے آل راؤنڈر رسل پر اینٹی ڈوپنگ قوانین کی خلاف ورزی کے باعث آئی سی سی نے ایک سال کی پابندی عائد کردی۔
غیر ملکی خبر رساں ادارے کے مطابق انسداد ڈوپنگ ٹریبونل کے چیئرمین ہیو فلکنر نے فیصلہ سنایا اور جاری کردہ ایک بیان میں کہا ہے کہ آندرے رسل اینٹی ڈوپنگ قوانین کی خلاف ورزی کا مرتکب ہوئے ہیں۔
ورلڈ ٹی ٹوئنٹی میں ویسٹ انڈیز ٹیم کی نمائندگی کرنے والے رسل کو گزشتہ سال اینٹی ڈوپنگ کے قوانین کے مطابق 2015 میں تین مرتبہ ٹیسٹ نہ کروانے پر قانون کی خلاف ورزی پر جواب طلب کیا گیا تھا جبکہ رسل قوانین کا جواب دینے میں ناکام رہے تھے۔ آل راؤنڈر پر پابندی کا اطلاق 31 جنوری سے ہوگا۔
واضح رہے کہ آندرے رسل حالیہ بگ بیش لیگ میں بھی کرکٹ جاری رکھے ہوئے تھے جہاں انہیں بلیک اور پنک اسٹیکر کا بلا استعمال کرنے پر بھی منع کردیا گیا تھا۔
