ڈھاکا: بنگلادیش میں نوبیل انعام یافتہ ڈاکٹر یونس کی عبوری کابینہ آج حلف اٹھائے گی۔
غیر ملکی میڈیا رپورٹس کے مطابق ڈاکٹر یونس کی سربراہی میں بنگلادیش میں عبوری کابینہ آج حلف اٹھائے گی، نوبیل انعام یافتہ ڈاکٹر یونس فرانس سے روانہ ہو گئے ہیں، اور آج دبئی سے ڈھاکا پہنچیں گے۔
بنگلادیش میڈیا کے مطابق حلف برادری کی تقریب آج رات ا8 بجے ہوگی، عبوری حکومت میں 15 ارکان ہو سکتے ہیں، آرمی چیف جنرل وقار الزمان کا کہنا ہے کہ مسلح افواج ڈاکٹر یونس کی ہر ممکن مدد کریں گی۔
آرمی چیف نے گزشتہ دو روز میں ملک میں ہونے والے واقعات پر شرمندگی کا اظہار کرتے ہوئے کہا کہ انھوں نے صورت حال کو سنبھالنے کی ہر ممکن کوشش کی، آرمی چیف نے کہا پرتشدد کارروائیوں میں ملوث افراد کو انصاف کے کٹہرے میں لایا جائے گا، اب ملک بھر میں حالات میں نمایاں بہتری آ رہی ہے۔
واضح رہے کہ 3 روز قبل شدید عوامی احتجاج کے بعد بنگلادیش میں حسینہ واجد کے 15 سالہ اقتدار کا خاتمہ ہو گیا ہے، فوج کی جانب سے ان سے استعفیٰ لیے جانے کے بعد وہ اپنی بہن کے ہمراہ فوجی ہیلی کاپٹر میں ملک چھوڑ کر بھارت فرار ہو گئی تھیں۔ بنگلادیشی صدر کو شدید عوامی مطالبے پر پالیمنٹ کو بھی تحلیل کرنا پڑا، جس سے فوج کے قبضے کی قیاس آرائیوں نے دم توڑا، طلبہ تحریک کے مطالبے ہی پر نوبل انعام یافتہ محمد یونس کو بنگلادیش کی عبوری حکومت کا سربراہ مقرر کر دیا گیا ہے۔
