ہندوستان میں اسسٹنٹ ہائی کمیشن پر حملے کے بعد بنگلہ دیش نے بھارت سے اپنے دو سفارت کاروں کو واپس بلا لیا ہے۔
بنگلہ دیش میں رواں سال عوامی احتجاج کے بعد 16 سالہ اقتدار اور ملک چھوڑ کر بھارت فرار ہونے والی حسینہ واجد کے اقتدار کے خاتمے اور محمد یونس کی سربراہی میں عبوری حکومت کے قیام کے بعد بنگلہ دیش اور بھارت کےدرمیان کشیدگی میں اضافہ ہوتا جا رہا ہے۔
غیر ملکی میڈیا کے مطابق بنگلہ دیش کی عبوری حکومت نے بھارت سے اپنے دو سفارت کاروں کو وطن واپس بلا لیا ہے۔
رپورت کے مطابق بنگلہ دیشی حکومت نے یہ قدم اگرتلہ، تری پورہ میں بنگلہ دیش کے اسسٹنٹ ہائی کمیشن پر حملے اور کولکتہ میں بنگلہ دیش کے ڈپٹی ہائی کمیشن کے سامنے احتجاج کے بعد اٹھایا ہے۔
ذرائع نے بتایا کہ کولکتہ میں بنگلہ دیش کے قائم مقام ڈپٹی ہائی کمشنر شکدار محمد اشرف الرحمان اور تریپورہ میں اسسٹنٹ ہائی کمشنر عارف الرحمان کو گزشتہ منگل کو ہنگامی بنیادوں پر ڈھاکا واپس جانے کی ہدایت کی گئی تھی۔
بنگلہ دیش کی وزارت خارجہ کے ذرائع نے تصدیق کی ہے کہ سفارت کار بنگلہ دیش واپس پہنچ گئے ہیں جبکہ تریپورہ کے اسسٹنٹ ہائی کمشنر کی بھی ڈھاکہ واپسی متوقع ہے۔
واضح رہے کہ چند روز قبل تریپورہ کے دارالحکومت اگرتلہ میں بنگلہ دیش کے سفارتی مشن میں توڑ پھوڑ کی گئی۔ اس معاملے میں 7 لوگوں کو گرفتار کیا گیا اور کیمپس میں گھسنے کے معاملے میں 4 پولیس اہلکاروں کے خلاف بھی کارروائی کی گئی تھی۔
اس واقعے کے بعد بنگلہ دیش میں ہندوستانی ہائی کمشنر کو طلب کر کے واقعے پر شدید احتجاج کیا گیا تھا اور اس کے علاوہ بنگلہ دیش نے اگرتلہ میں اپنی قونصلر سروس بند کرنے کا اعلان کیا تھا۔
بنگلہ دیش کا بڑا اعلان، عبوری حکومت شیخ حسینہ کو بھارت سے واپس لائیگی
