پاکستان کے خلاف ٹیسٹ سیریز میں تاریخی فتح حاصل کرنے کے بعد بنگلہ دیش کرکٹ ٹیم اپنے وطن واپس پہنچ گئی۔
ایئرپورٹ پر بنگلہ دیش کرکٹ بورڈ کے عہدیداران نے اپنی ٹیم کا شاندار استقبال کیا، ڈھاکا ایئرپورٹ پر کھلاڑیوں کو پھول پیش کیے گئے اور مٹھائی کھلائی گئی۔
بنگلہ دیش کرکٹ ٹیم نے دو صفر سے ٹیسٹ سیریز جیت کر تاریخ رقم کرتے ہوئے پاکستان کے خلاف پہلی مرتبہ ٹیسٹ میں کامیابی حاصل کی ہے۔
دوسری جانب پاکستان کو وائٹ واش کرنے والی بنگلہ دیش کرکٹ ٹیم کے مقابلے کے لیے بھارت ہوم سیریز میں مضبوط اسکواڈ کا چناؤ کریگا۔
اجیت اگرکار کی سربراہی میں بی سی سی آئی کی سلیکشن کمیٹی بنگلہ دیش کے خلاف ٹیسٹ سیریز کے لیے کھلاڑیوں کے ناموں کا اعلان دلیپ ٹرافی کا پہلا راؤنڈ ختم ہونے کے بعد کریگی، ڈومیسٹک ایونٹ کا آغاز جمعرات سے بنگلورو اور اننتاپور میں ہوگا۔
بھارتی سلیکٹر آئندہ ٹیسٹ سیریز کے لیے بھارت کی مضبوط ٹیم منتخب کرنے کے خواہاں ہیں، بنگلہ دیش کے ہاتھوں پاکستان کی شرمناک شکست کے بعد بھارت کو بھی اپنی سرزمین پر بنگال ٹائیگرز کے ہاتھوں شکست کا خوف کہیں نہ کہیں درپیش ہے۔
ایسے میں بھارتی بورڈ اور سلیکٹرز ہوم سیریز کے حوالے سے محتاط ہیں اور کسی قسم کا رسک لینے کے بجائے ایک متوازن اسکواڈ منتخب کرنا چاہتے ہیں۔
دلیپ ٹرافی میں تقریباً تمام ہی انٹرنیشنل بھارتی کرکٹرز حصہ لے رہے ہیں جن میں کے ایل راہول، شبمن گل، کلدیپ یادیو، یشسوی جیسوال، سرفراز خان، ریشبھ پنت اور دیگر بڑے نام شامل ہیں۔
شاہین نے کندھے سے ہاتھ کیوں ہٹایا؟ شان مسعود نے خاموشی توڑ دی
کرکٹ ویب سائٹ کرک انفو کی رپورٹ کے مطابق بنگلہ دیش کے خلاف دو ٹیسٹ میچوں کی سیریز کے لیے دلیپ ٹرافی کے پہلے راؤنڈ کے اختتام پر بھارتی پلیئرز کے ناموں کا اعلان کیا جائے گا۔
