گجرات: بھارتی ریاست گجرات کے شہر ودودرا میں بینک ڈکیتی کے دوران ایک ڈکیت کے ساتھ دہشت ناک واقعہ پیش آیا، حادثاتی طور پر اس نے تجوری کی جگہ اپنا گلا کاٹ ڈالا۔
غیر ملکی میڈیا کے مطابق بھارتی شہر ودودرا کے ایک بینک کے اندر ڈکیت تجوری کو کاٹنے کے لیے لانے والے الیکٹرک کٹر سے اپنا ہی گلا کاٹ بیٹھا جس کی وجہ سے وہ موقع ہی پر مر گیا۔
رپورٹس کے مطابق پولیس نے کہا ہے کہ بینک کے اندر ایک شخص کی لاش ملی جو اپنے ہی خون کے تالاب میں لت پت تھا، اس کے قریب برقی کٹر بھی پڑا ہوا تھا جسے وہ مبینہ طور پر تجوری کاٹنے کے لیے لایا تھا، لیکن اپنا ہی گلا کاٹ بیٹھا۔
پولیس کا کہنا تھا کہ یہ واقعہ رواں ہفتے ودودرا کے اجیون اسمال فنانس بینک میں پیش آیا، ڈکیت رات پونے ایک بجے بینک میں داخل ہوا، لیکن اس سے قبل کہ تجوری کاٹ کر اندر سے رقم نکالتا، حادثاتی طور پر کٹر اس کے اپنے گلے پر پھر گیا۔
حکام کا خیال ہے کہ ڈکیت نے اندھیرے میں مشین کے پھنسے ہوئے تار کو کھینچا ہوگا، جس پر کٹر کا رخ اس کی طرف ہو گیا ہوگا۔
چنائی میں بینک کی سیکورٹی ٹیم نے سی سی ٹی وی پر ڈکیت کو پہلے ہی دیکھ لیا تھا اور برانچ منیجر کو اس کی موجودگی سے مطلع بھی کر دیا تھا، جب منیجر پرشانت شرما بینک پہنچا تو اس نے ڈکیت کو اپنے ہی خون میں ڈوبا ہوا پایا۔
حکام کی جانب سے ڈکیت کی باضابطہ شناخت کے لیے خاندان کے افراد کا انتظار کیا جا رہا ہے، جس کے بعد اس کی شناخت بھی میڈیا میں جاری کر دی جائے گی، پولیس نے ڈکیتی کی کوشش کا مقدمہ بھی درج کر لیا ہے۔
مقامی پولیس اسٹیشن کے انسپکٹر کا کہنا تھا کہ تجوری کے آس پاس کی جگہ بہت چھوٹی ہے اور اس میں صرف ایک بندہ ہی کھڑا ہو سکتا ہے، اندھیرے کی وجہ سے چور تنگ جگہ پر اپنی حرکات بھی نہیں سمجھ سکا ہوگا، اس نے تار کھینچا ہوگا اور اس وقت کٹر اس کے گلے کی طرف ہو گیا ہوگا۔
