کراچی: ہفتہ وار تعطیلات کے دوران شہر قائد میں ایک اور نجی بینک کا صفایا کردیا گیا، مسلح ملزمان بینک کے درجنوں لاکرز لوٹ کر فرار ہوگئے۔
کراچی میں اسٹریٹ کرائم کے ساتھ ساتھ بینک ڈکیتیوں میں اضافہ ہوتا جارہا ہے، گذشتہ ماہ کراچی کے علاقے دو منٹ چورنگی پر واقع بینک میں مسلح ملزمان نے دھاوا بولتے ہوئے لاکھوں روپے لوٹے اور فرار ہوگئے تھے۔
آج بھی شہر قائد کے ایک اور بینک کا صفایا کردیا گیا، بینک ڈکیتی کی واردات کراچی کے علاقے سخی حسن میں ہوئی، جہاں مسلح ملزمان بینک کے درجنوں لاکرز لوٹ کر فرار ہوگئے۔
واقعے سے متعلق پولیس کا کہنا ہے کہ چار مسلح ملزمان رات گئے بینک میں داخل ہوئے اور ڈیوٹی پر موجود سیکیورٹی گارڈ سے اسلحہ چھین کر انہیں یرغمال بنالیا، سیکیورٹی گارڈ کو یرغمال بنانے کے بعد ملزمان نے بینک ڈکیتی کی۔
پولیس رپورٹ کے مطابق ملزمان بینک کے لاکرز کاٹنے کے لئے گیس سلنڈر اور کٹر مشین بھی ساتھ لائے، سیکیورٹی گارڈز کو یرغمال بنانے کے بعد مسلح ملزمان نے تسلی کے ساتھ تمام لاکرز کو کاٹا اور لاکرز میں موجود تمام سامان لوٹ کرفرار ہوگئے۔
ایس ایس پی سینٹرل ملک مرتضیٰ نے میڈیا کو بتایا کہ ملزمان نے چونتیس لاکرز کاٹ کر سامان لوٹا، لوٹے گئے سامان کی مالیت کروڑوں روپے بتائی جاتی ہے، واردات کے بعد ملزمان بینک کا ڈی وی آر سسٹم اٹھا کرلےگئے۔
ملک مرتضیٰ کا کہنا تھا کہ سکیورٹی گارڈ اپنےدوست کےساتھ کھاناکھانےگیا تھا، واپس آکر گارڈ نےبینک کا دروازہ کھولاتو ملزمان ساتھ داخل ہوگئے، ملزمان رات نو بجےسےصبح پانچ بجےتک بینک میں رہے اور کارروائی کی، طریقہ واردات سے لگتا ہےکہ ملزمان کو پہلےسے معلومات تھی، واردات کےحوالےسےمزیدتفتیش جاری ہے۔
پولیس حکام نے تفتیش کے لئے بینک کے دونوں سیکیورٹی گارڈز کو حراست میں لے لیا ہے۔
