واشنگٹن : امریکی صدر براک اوباما نے سٹیٹ آف دی یونین سے آخری خطاب کیا، جس میں اوباما نے امریکیوں کو مستقبل سے خوفزدہ نہ ہونے کامشورہ دیا۔
امریکی صدر براک اوباما نے اپنے دورصدارت کے آٹھویں اور آخری خطاب کا آغاز معاشی صورتحال، روزگار، دہشت گردی، بندوق سے پھیلنے والے تشدد اور آئندہ انتخابات سے کیا ۔
ان کا کہنا تھا کہ امریکیوں کو مستقبل سے خوفزدہ نہیں ہونا چاہیے، ہمیں ہر اس سیاست کو مسترد کرنے کی ضرورت ہے جو لوگوں کو مذہب اور نسل کی بنیاد پر نشانہ بناتی ہے۔
امریکی صدر کا کہنا تھا کہ امریکہ کو غیر معمولی اصلاحات کی ضرورت ہے، انہوں نے کہا کہ القاعدہ اور داعش امریکی عوام کے لیے براہ راست خطرہ ہیں، انہیں ختم کرنا ہوگا۔
امریکی صدر بارک اوباما نے کہا کہ القاعدہ کے بعد اب دنیا کو داعش سے خطرہ لاحق ہے، جس کا خاتمہ کرنا ضروری ہے۔
صدر باراک اوباما نے کہا کہ داعش کے بغیر بھی پاکستان، افغانستان، مشرق وسطیٰ، وسطی امریکا ،افریقا اور ایشا میں عدم استحکام کا خدشہ کئی دہائیوں تک رہے گا، ان میں سے بعض علاقے نئے دہشتگرد گروپس کے لیے محفوظ ٹھکانے ثابت ہوسکتے ہیں۔
