دنیا بھر میں جہاں کرونا وائرس نے سب کو دہشت میں مبتلا کر رکھا ہے اور نظام زندگی معطل ہے، وہیں لوگوں نے کاروبار زندگی چلانے کے لیے نئے نئے طریقے بھی ڈھونڈنے شروع کر دیے ہیں۔
چین میں بھی ایسی ہی کچھ حجام اپنی انوکھی حرکت کی وجہ سے سوشل میڈیا پر بہت وائرل ہورہے ہیں، حجاموں نے کرونا وائرس سے بچنے کے لیے اپنے گاہکوں سے محفوظ فاصلہ رکھتے ہوئے بال کاٹنے کے اوزار ایک 4 فٹ طویل ڈنڈے پرلگا دیے ہیں جس کے مدد سے وہ گاہکوں کے قریب جائے بغیر ان کے بال کاٹ سکتے ہیں۔
چین کے صوبے ہنان میں موجود ان حجاموں نے ماسک پہنا ہوا ہے، 4 فٹ طویل ڈنڈے کے ایک سرے پر انہوں نے برش، شیور اور ہیئر ڈرائر لگا دیے ہیں جس کے دوسرے سرے پر کھڑے ہو کر وہ کام کرتے ہیں۔
دکان کے مالک وو جن لونگ کا کہنا ہے کہ اس طرح کام کرنے سے اس صفائی اور نفاست سے کام نہیں ہوتا جس طرح ہاتھ سے ہوتا ہے لیکن وہ ایسا بحالت مجبوری اپنی اور گاہکوں کی حفاظت کے لیے کر رہے ہیں۔
خیال رہے کہ چینی حکام نے وائرس سے بچنے کے لیے پرہجوم مقامات پر لوگوں کو آپس میں ڈیڑھ میٹر کا فاصلہ رکھنے کا ہدایت کی ہے۔
جان لیوا وائرس سے اب تک دنیا بھر میں 3 ہزار 205 ہلاکتیں ہوچکی ہیں اور 93 ہزار 500 افراد متاثر ہیں۔ چین میں اس وائرس کی شدت میں کمی آرہی ہے تاہم اب یہ وائرس دنیا کے دیگر ممالک میں پھیل رہا ہے۔
