وزیر اعلیٰ پنجاب مریم نواز کی ہدایت پر بسنت کے موقع پر ایمرجنسی پلان جاری کر دیا گیا۔
محکمہ ایمرجنسی سروسز پنجاب نے لاہور کیلئے ایمرجنسی کے اضافی وسائل مہیا کر دیے۔ لاہور میں 1200 سے زائد ریسکیو اہلکار اور 56 ایمبولنسز مختلف مقامات پر ہوں گی۔
لاہور میں 24فائر وہیکلز اور 300 ریسکیو موٹربائیکس اہم مقامات پر ہوں گی۔ خواجہ سلمان رفیق کا کہنا ہے کہ بسنت کے دوران ریسکیو 1122ہائی الرٹ ہو گی۔
حکام کی جانب سے بریفنگ میں کہا گیا کہ لاہور میں 23 ریسکیو اسٹیشنز کے ساتھ اہم مقامات پر خصوصی "کی پوائنٹس”بنائیں گے، تنگ گلیوں ،ٹریفک میں بروقت رسائی کیلئے ریسکیو موٹر بائیک خصوصی "کی پوائنٹس” پرمقرر ہوں گی۔
لاہور میں بسنت میلہ سجنے کی تیاریوں کے پیش نظر محکمہ صحت پنجاب نے شہر کے 13 سرکاری اسپتالوں کو ہائی الرٹ کر دیا ہے۔
مراسلے میں کہا گیا یہ اسپتال 6 سے 8 فروری تک ہائی الرٹ رہیں گے۔
محکمہ صحت نے ہدایت کی ہے کہ تمام اسپتالوں میں میڈیکل، نرسنگ اور پیرا میڈیکل اسٹاف کی مکمل موجودگی یقینی بنائی جائے۔
اس کے علاوہ ادویات، ڈرپس، ویکسین اور ضروری سرجیکل سامان کی دستیابی بھی مکمل رکھنے کا حکم دیا گیا ہے۔
مراسلے میں کہا گیا ہے کہ بسنت کے دوران ممکنہ ہنگامی صورتحال کے پیش نظر اسپتالوں میں بیڈز مختص کیے جائیں جبکہ بلڈ بیگز اور خون عطیہ کرنے والے افراد کی فہرستیں بھی تیار کی جائیں۔
محکمہ صحت نے یہ بھی ہدایت کی ہے کہ ایکسرے، الٹراساؤنڈ، سی ٹی اسکین اور ایم آر آئی مشینیں ہر وقت فنکشنل رکھی جائیں۔
اس کے ساتھ ساتھ تمام اسپتالوں میں فعال موبائل اور ٹیلی فون کنکشن کی دستیابی یقینی بنانے اور ہنگامی صورتحال سے نمٹنے کے لیے جامع پلان تیار کر کے فوری طور پر محکمہ صحت پنجاب کو جمع کرانے کا حکم دیا گیا ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں