کراچی: سابق ٹیسٹ کرکٹر باسط علی کا کہنا ہے کہ سرفراز احمد کو ٹی ٹوینٹی ٹیم کی قیادت سے ہٹانے کا فیصلہ درست نہیں تھا۔
اے آر وائی نیوز کی رپورٹ کے مطابق سابق ٹیسٹ کرکٹر باسط علی نے اے آر وائی نیوز کے پروگرام ’’اسپورٹس روم‘‘ میں گفتگو کرتے ہوئے کہا کہ کھلاڑی ایک میچ میں پرفارم نہیں کرتا تو اس کو ہیرو سے زیرو بنادیا جاتا ہے۔
باسط علی نے سرفراز کی حمایت کرتے ہوئے کہا کہ مصباح الحق کا سرفراز پر اعتماد اچھی بات ہے، دورہ انگلینڈ میں انہیں موقع ضرور دینا چاہئے۔
واضح رہے کہ چند ماہ قبل سرفراز احمد کو تینوں فارمیٹ کی کپتانی سے ہٹا دیا گیا تھا اور ٹیسٹ کی کپتانی اظہر علی اور ون ڈے، ٹی ٹوینٹی کی قیادت بابر اعظم کے سپرد کی گئی تھی۔
سابق کھلاڑیوں کی جانب سے سرفراز کے حق میں آوازیں اٹھائی گئی تھی اور مداحوں نے بھی پریس کلب پر احتجاج ریکارڈ کرایا تھا لیکن پی سی بی کے سر پر جوں تک نہ رینگی۔
اب سرفراز احمد کو دورہ انگلینڈ کے لیے منتخب کیا گیا تھا اور ان دنوں وہ پریکٹس میچ میں ڈومیسٹک ٹیم کی قیادت کررہے ہیں، خیال رہے کہ پاکستان اور انگلینڈ کے درمیان پہلا ٹیسٹ 5 اگست سے کھیلا جائے گا، اس ٹیسٹ میں سرفراز منتخب ہوتے ہیں یا محمد رضوان یہ کہنا قبل ازوقت ہے۔
