لندن سے روس تک 1200 کلو میٹر سے زائد کا سفر طے کرنے والی چمگادڑ ایک بلی کا شکار بن گئی۔
غیرملکی خبررساں ادارے کی رپورٹ کے مطابق لندن سے اپنے سفر کا آغاز کرنے والی چمگادڑ 1254 کلو میٹر کا ریکارڈ سفر طے کرنے کے بعد روس پہنچی جہاں اسے ایک بلی نے اپنی خوراک بنالیا۔
چمگادڑ روس کے چھوٹے سے گاؤں مولگینو سے 30 جولائی کو ملی تھی جسے ایک بلی نے بری طرح سے زخمی کردیا تھا تاہم چمگادڑ زیادہ دیر جانبر نہ رہ سکی۔
چمگادڑ کی اڑان کو اب تک کی سب سے طویل ہجرت قرار دیا جارہا ہے جو ایک ریکارڈ ہے تاہم اس کا اختتام انتہائی المناک ہوا۔
بیٹ کنزرویشن ٹرسٹ کے سربراہ کا کہنا ہے کہ ایک قابل ذکر سفر تھا جو لندن سے شروع ہو کر روس میں اختتام پذیر ہوا، رضاکاروں اور محققین کا شکریہ جو اس ساری ریسرچ میں ساتھ رہے۔
ٹرسٹ کے سربراہ کے مطابق ان غیرمعمولی جانوروں کی حفاظت اور ان کی دلچسپ زندگی کے بارے میں جاننا بہت اچھا ہے، روس اور برطانیہ کے ماہرین اس طویل سفر کے بارے میں مزید سمجھنے کے لیے مل کر کام کررہے ہیں۔
چمگادڑوں کے بارے میں بتایا گیا ہے کہ وہ موسم سرما میں مشرقی یا مغربی یورپ سے برطانیہ کی طرف ہجرت کرتے ہیں۔
