ٹوکیو : جاپان الیکٹرک کاروں کی بیٹری پرزہ جات کے حصول کیلئے کینڈین حکومت کے ساتھ اہم معاہدہ کرے گا۔
اس معاہدے کے تحت جاپان کینیڈا کے معدنی ذخائر نکالنے کیلئے جدید ٹیکنالوجی کے ساتھ اسے مالی مدد بھی فراہم کرے گا۔
تفصیلات کے مطابق جاپان کی حکومت نے الیکٹرک گاڑیوں میں استعمال ہونے والی بیٹریوں کے اہم پرزہ جات تک رسائی کو یقینی بنانے کے ساتھ ساتھ شمالی امریکہ کی منافع بخش منڈی میں قدم جمانے کے لیے کینیڈا کے ساتھ ایک معاہدہ کیا ہے۔
غیرملکی خبر رساں ادارے کی رپورٹ کے مطابق الیکٹرک گاڑیوں کی بیٹریوں میں استعمال ہونے والی نکل، کوبالٹ اور لیتھیم جیسی معدنیات کے لیے مسابقت بڑھ رہی ہے۔
کینیڈا کے پاس ان معدنیات کے بڑے ذخائر موجود ہیں جنہیں نکالنے اور ان کا مکمل پروسیس کرنے کے لیے اسے جدید ٹیکنالوجی کی ضرورت ہے۔
معاہدے کے مطابق اس سلسلے میں جاپان کینیڈا کو مالی اور تکنیکی مدد فراہم کرے گا اور کینیڈا وہاں بیٹری پلانٹس لگانے والی جاپانی کمپنیوں کو مختلف رعایتیں بھی دے گا۔
دونوں ممالک کے درمیان اس تعاون کا مطلب شمالی امریکہ میں پلانٹس کے حامل جاپانی کار ساز اداروں کے لیے بہتر سپلائی چین کا فروغ بھی ہے۔
اس حوالے سے جاپان کے وزیر تجارت نِشی مُورا یاسُوتوشی تعاون کی یاد داشت پر دستخط کرنے کے لیے اگلے ہفتے کینیڈا کا دورہ کرنے والے ہیں۔
