اسپین کے علاقے کوردوبا میں جنگی ہاتھی کے ممکنہ آثار دریافت ہوئے ہیں، ہاتھی کی ہڈی برآمد ہونے کے بعد ہنی بال کے جنگی لشکر کا پہلا ٹھوس ثبوت سامنے آگیا۔
زمانہ قدیم کی جنگوں میں ہاتھیوں کا استعمال ایک خوفناک منظر کی طرح بیان کیا جاتا ہے، مگر اب تک ان کا وجود زیادہ تر تصویروں اور تحریروں تک محدود تھا۔
لیکن اب جنوبی اسپین کے شہر کوردوبا میں ماہرینِ آثارِ قدیمہ کے تحت ہونے والی کھدائی نے پہلی بار ایسا مادی ثبوت فراہم کیا ہے جو ان کہانیوں کو حقیقت کے قریب لے آیا ہے۔
غیر ملکی میڈیا رپورٹ کے مطابق ماہرینِ آثارِ قدیمہ کو ماضی کی کارتھیجینی افواج کے نشانات کے ساتھ
ایک فوسل شدہ جنگی ہاتھی کی ہڈی جس کی لمبائی تقریباً 10 سینٹی میٹر ہے اور کانسی کی لگام ملی ہے۔
تحقیق کے مطابق یہ ہاتھی کی اگلی ٹانگ کے نچلے حصے کی ہڈی ہے، اس سلسلے میں دعویٰ کیا جا رہا ہے کہ یہ دوسری پیونک جنگ (218 تا 201 قبل مسیح) میں استعمال ہونے والے کارتھیجینی جنگی ہاتھیوں کا پہلا واضح جسمانی ثبوت ہوسکتا ہے۔
یونیورسٹی آف کارڈوبا کے ماہر آثار قدیمہ اور تحقیق کے مرکزی مصنف نے لائیو سائنس سے گفتگو میں کہا کہ یہ ہڈی ایک انقلابی دریافت ثابت ہوسکتی ہے۔
تقابلی اور مطالعاتی جائزے سے یہ اشارہ ملتا ہے کہ مذکورہ ہڈی ایسے ہاتھی کی ہوسکتی ہے جس کی نسل اور زمانہ اُن جانوروں سے مطابقت رکھتا ہے جو ہنیبل بارکا نے دوسری پیونک جنگ میں استعمال کیے تھے، جب اس کا مقابلہ رومی سپہ سالار سے تھا۔
اس کے علاوہ رومی مؤرخ لیوے نے اپنی تاریخی تصنیف میں دریائے ٹریبیہ کی لڑائی کا ذکر کرتے ہوئے ایک لرزہ خیز منظر بیان کیا تھا کہ اس جنگ میں فوجیوں کی بڑی تعداد دریا میں بہہ گئی اور کچھ دوسری جانب کنارے تک جاپہنچے اور ہاتھیوں کے پاؤں تلے کچلے گئے۔
لیوی مزید لکھتے ہیں کہ یہ دیو قامت جانور لشکر کے کناروں پر کھڑے ہو کر نہ صرف اپنی شکل بلکہ اپنی مخصوص بو سے بھی فوجیوں کے گھوڑوں کو بدحواس کردیتے اور میدان میں خوف و ہراس پھیلا دیتے تھے۔
رپورٹ کے مطابق یہ ہڈی جنوبی اسپین کے ایک گاؤں میں کھدائی کے دوران مٹی کی اس تہہ سے برآمد ہوئی جس کی کاربن ڈیٹنگ کے مطابق عمر تقریباً 2 ہزار 250 سال ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں