پاکستانی ڈیزائنر کا تیار کردہ خوبصورت اور منفرد نکاح نامہ -
The news is by your side.

Advertisement

پاکستانی ڈیزائنر کا تیار کردہ خوبصورت اور منفرد نکاح نامہ

پاکستانی نژاد کینیڈین نوجوان نے اپنی بہن کی شادی کے لیے سادہ سے نکاح نامے کو رنگوں اور خطاطی سے مزین کر کے اور نہایت خوبصورت انداز میں پیش کر کے سب کو حیران کردیا۔

عمر شہزاد نامی یہ نوجوان ڈیزائنر کافی عرصے سے گرافکس ڈیزائنر کے شعبے میں کام کر رہا تھا۔ اس کے خاندان کے کئی افراد مصوری کے شعبے سے منسلک تھے جبکہ اس کی بہن بھی خطاط تھی۔

جب اس کی بہن کی شادی کا موقع آیا تو اس نے اسے کچھ اچھوتا اور منفرد تحفہ دینے کا سوچا۔ تب ہی اسے ڈیزائنر نکاح نامے کا خیال آیا۔

عمر کا کہنا تھا، ’شادی کسی کی بھی زندگی کا ایک اہم موقع ہوتا ہے۔ اس موقع پر ایک ایک چیز کا خیال رکھا جاتا ہے، لیکن اس شادی میں جو سب سے اہم دستاویز ہوتی ہے یعنی نکاح نامہ، اسے نظر انداز کردیا جاتا ہے اور پرانے اخبار جیسے دستاویز پر دستخط لےلیے جاتے ہیں‘۔

عمر نے اپنے منصوبے کو پایہ تکمیل تک پہنچانے کے لیے سب سے پہلے علما سے رابطہ کیا کہ آیا اس طرح کے ڈیزائنر نکاح نامے قابل قبول ہیں یا نہیں۔

ان کی طرف سے گرین سگنل ملنے کے بعد اس نے اپنی بہن سے اپنا اور اپنے ہونے والے شوہر کا نام خوبصورت خطاطی میں لکھنے کو کہا۔

عمر نے آخری وقت تک بہن کو نہیں بتایا کہ اس کے ذہن میں کیا منصوبہ ہے۔ بالآخر شادی کے روز جب خوبصورت ڈیزائن اور رنگوں سے مزین نکاح نامہ تیار اس نے اپنی بہن کو دکھایا تو وہ اسے دیکھ کر خوشی سے نہال ہوگئی۔

عمر کا کہنا ہے کہ اس نے نکاح نامے کی تصاویر سوشل میڈیا سائٹس پر شیئر کیں تو لوگوں کی بڑی تعداد نے اس سے رابطہ کیا کہ وہ اپنی یا اپنے کسی عزیز کی شادی کے لیے ایسا نکاح نامہ بنوانا چاہتے ہیں۔

یہی نہیں عمر نے اپنی بہن کی شادی کے دعوتی کارڈز بھی خود ڈیزائن کیے جو نہایت دیدہ زیب اور دلکش دکھائی دیتے ہیں۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Comments

comments

یہ بھی پڑھیں