پیرس: فرانس میں روبے سائیکل ریس کے دوران بیلجیم کے نوجوان سائیکلسٹ میشائل گولاٹس دل کا دورہ پڑنے سے چل بسے، ریس میں ان کی اولین شرکت آخری ثابت ہوئی۔
بین الاقوامی میڈیا کے مطابق 23 سالہ گولاٹس فنش لائن سے 150 کلو میٹر کے فاصلے پر اچانک بے ہوش گئے، ہیلی کاپٹر کے ذریعے انہیں فوری طور پر اسپتال منتقل کیا گیا تاہم وہ جانبر نہ ہوسکے۔
23 سالہ میشائل گولاٹس 4 برس قبل 20 برس کی عمر میں پروفیشنل سائیکلسٹ بنے تھے، بیلجیم کے ویرنداس ولیم ٹیم کی نمائندگی کرنے والے گولاٹس فرانس کی مشہور پیرس روبے سائیکل ریس میں پہلی مرتبہ شرکت کررہے تھے۔
ویرنداس ولیم ٹیم نے گولاٹس کی موت پر گہرے صدمے کا اظہار کرتے ہوئے کہا ہے کہ یہ ایک ناقابل یقین صدمہ ہے، اس واقعے کے بارے میں مزید معلومات فراہم نہیں کی جائیں گی کیونکہ ہم چاہتے ہیں گولاٹس کے عزیز و اقارب اس غم میں خود کو سنبھال سکیں۔
سائیکلنگ کے بین الاقوامی ادارے یو سی آئی کے صدر کا کہنا ہے کہ وہ گولاٹس کی ناگہانی موت پر افسوس کا اظہار کرتے ہیں اور اس غم میں برابر کے شریک ہیں۔
واضح رہے کہ دو سال قبل کوزیکا کریٹیریم انٹرنیشنل ریس میں شامل 22 سالہ بیلجیم کے سائیکلسٹ مینگہیر کو بھی دل کا دورہ پڑا تھا جس کے دو دن بعد وہ چل بسے تھے، جبکہ 2011 میں بیلجیم کے ہی سائیکلسٹ لینڈ جیرو ڈی اطالیہ ریس کے دوسرے مرحلے میں حادثے کے نتیجے میں ہلاک ہوگئے تھے۔
