نیویارک : امریکی ماڈل بیلا حدید نے انسٹاگرام پر متنازع تصویر پر سعودیوں اور اماراتیوں سے معذرت کرتے ہوئے کہا میں نے کبھی ان فضائی کمپنیوں یا ان کے ملکوں کے حوالے سے احترام میں کمی نہیں کی۔
تفصیلات کے مطابق امریکا کی سپر ماڈل بیلا حدید نے اپنی طرف سے انسٹاگرام پر پوسٹ کی جانے والی تصویر کے حوالے سے معذرت کر لی ہے، بعض لوگوں نے اس تصویر کو سعودی عرب اور امارات کے لیے عدم احترام شمار کیا تھا۔
سعودی اور اماراتی حلقوں نےBellaHadidIsRacist کے نام سے ٹرینڈ چلایا تھا، اس میں باور کرایا گیا کہ بیلا کی جانب سے یہ فعل سعودیوں، اماراتیوں اور ان کے اوطان کے لیے عدم احترام کا مظہر ہے ، لہذا اس کو یکسر مسترد کیا جاتا ہے۔
اس کے علاوہ حدید کو سپورٹ کرنے والی مصنوعات کے بائیکاٹ کا بھی اعلان کیا گیا۔
فلسطینی نژاد امریکی بیلا حدید نے عربی اور انگریزی زبانوں میں جاری اپنی معذرت میں کہا ہے کہ وہ نفرت کو کسی طور قبول نہیں کرتی ہیں۔
انہوں نے واضح کیا کہ انسٹاگرام پر پوسٹ کی جانے والی تصویر کو غلط سمجھا گیا اور اس کا سیاست سے کوئی تعلق نہیں ہے، میں نے تصویر کے پس منظر میں سعودی اور اماراتی فضائی کمپنیوں کے طیاروں کی موجودگی پر توجہ نہیں دی۔
— Bella Hadid (@bellahadid) June 17, 2019
امریکی ماڈل نے باور کرایا کہ میں نے کبھی ان فضائی کمپنیوں یا ان کے ملکوں کے حوالے سے احترام میں کمی نہیں کی۔
بیلا نے کہا کہ میں ان تمام لوگوں کے سامنے تہِ دل سے انتہائی معذرت خواہ ہوں جنہوں نے یہ سمجھا کہ میں ان پر بالخصوص سعودی عرب اور امارات کے حوالے سے کسی قسم کی تنقید کر رہی ہوں۔
