بینظیر انکم سپورٹ پروگرام کے ذریعہ ملک بھر میں مستحق گھرانوں کی مالی امداد کی جاتی ہے اس پروگرام میں شامل ہونے کا عمل انتہائی سادہ ہے۔
اے آر وائی نیوز کے مطابق بے نظیر انکم سپورٹ پروگرام (بی آئی ایس پی) کے ذریعہ حکومت ملک بھر میں لاکھوں خاندانوں کو مالی امداد فراہم کر رہی ہے۔ ہر تین ماہ بعد 10 ہزار 500 روپے سے 13 ہزار 500 روپے کی رقم فراہم کی جاتی ہے۔
بی آئی ایس پی پروگرام کا دائرہ کار بڑھانے اور اس پروگرام میں شامل خاندانوں کی تعداد ایک کروڑ تک لے جانے کے لیے چاروں صوبوں میں ڈائنامک سروے جاری ہے۔
ڈائنامک سروے میں کسی بھی مستحق خاندان کا اندراج بہت آسان ہے۔ تاہم اس کے لیے کچھ دستاویزات لازمی ہیں۔
ڈائنامک سروے میں رجسٹریشن کے لیے اہل افراد بی آئی ایس پی میں ڈائنامک رجسٹریشن ڈیسک پر آئیں اور وہاں موجود عملے کو اپنا شناختی کارڈ اور بچوں کا نادرا کا ب فارم مہیا کریں۔ اس کے بعد عملہ آپ کو نئے سروے کا اپ ڈیٹ سروے کا ٹوکن جاری کرے گا۔
ٹوکن نمبر کے مطابق مذکورہ امیدوار کو سروے کے لیے رجسٹریشن روم میں جانا ہوگا۔ وہاں ڈیٹا انٹری آپریٹر ان سے سماجی ومعاشی معلومات پر مشتمل سوالات پوچھے گا۔ فارم مکمل ہونے کے بعد تصدیق کے لیے اقرار نامہ پر انگوٹھا لگوایا جائے گا۔
اس کے بعد 8171 سے سروے کا تصدیقی میسج موصول ہوگا۔ جانچ پڑتال کے بعد مستحق گھرانوں کو 811 سے اہلیت کا پیغام موصول ہوگا۔
رجسٹریشن سے قبل ضروری ہدایات
بی آئی ایس پی کی جانب سے 8171 سے میسج ملنے کے بعد بتائی گئی تاریخ کو بینظر انکم سپورٹ پروگرام کے تحصیل دفتر میں رجسٹریشن سینٹر تشریف لے جائیں۔
اس کے علاوہ وہ گھرانے جو ابھی تک سروے کا حصہ نہیں بنے، وہ بھی تشریف لا سکتے ہیں۔ سینٹر پر آتے ہوئے اپنے ساتھ بچوں کا نادرا ب فارم ضرور ساتھ لائیں۔ اس کے ساتھ رجسٹریشن کرواتے وقت بجلی کا حالیہ بل لائیں اور اپنا زیر استعمال موبائل نمبر ہی درج کرائیں۔
