یوں تو دہی سارا سال ہی استعمال کی جاتی ہے مگر ماہ رمضان میں دہی کا استعمال زیادہ ہو جاتا ہے دن بھر پیاس کا اثر کم کرنے اور جسم کو ٹھنڈا رکھنے کیلئے لوگ سحری کے علاوہ افطاری میں بھی دہی کھانا پسند کرتے ہیں۔
دہی میں پروٹین، کیلشیم، وٹامنز اور پروبائیوٹکس کی مقدار زیادہ ہوتی ہے، دہی ہڈیوں اور دانتوں کو تحفظ فراہم کرنے کے ساتھ ہاضمہ کے مسائل کو روکنے میں بھی مدد کر سکتی ہے، مگر بہت کم افراد کو ہی اس کے متعدد چھپے ہوئے فوائد کا علم ہوتا ہے درحقیقت یہ ایسی چیز ہے جو ہماری غذا کا لازمی حصہ ہونا چاہئے۔
موجودہ دور میں فروزن دہی بھی کافی پسند کیا جارہا ہے اگر آپ جسمانی طور پر پتلے اور اسمارٹ رہنا چاہتے ہیں اور جِم جانے کے لیے وقت نکالنا مشکل لگتا ہے یا کسی مخصوص غذا تک محدود رہنا چاہتے ہیں تو دہی کو کھانا معمول بنا لینے سے یہ مقصد حاصل کیا جاسکتا ہے۔
کم چکنائی والا دہی وزن کم کرنے والی غذا میں پروٹین کا ایک مفید ذریعہ ہوتا ہے، دہی میں پائے جانے والے پروبائیوٹکس مدافعتی نظام کو بڑھا سکتے ہیں۔
اس کے علاوہ وزن کو کم کرنے کے لیے مناسب غذاء اور ڈائٹ پلان حاصل کرنے کے لیے اپنے قریبی ماہر غذائیت سے رابطہ کریں۔
