The news is by your side.

سردیوں میں انجیر کا استعمال بے شمار فوائد کا سبب

انجیر یوں تو سارا سال ہی دستیاب ہوتی ہے لیکن سردیوں میں اس کا استعمال بے حد بڑھ جاتا ہے، اس کے فوائد جان کر آپ اسے باقاعدگی سے استعمال کرنے پر مجبور ہوجائیں گے۔

انجیر کو جنت کا پھل کہا جاتا ہے، یہ ایک بے حد صحت بخش پھل ہے اور اس میں وہ تمام اجزا پائے جاتے ہیں جو انسان کو صحت مند رکھنے اور بیماریوں سے تحفظ دینے میں کلیدی کردار ادا کرتے ہیں۔

ویسے تو یہ پھل سارا سال ہی باآسانی ہر جگہ دستیاب ہوتا ہے، لیکن اسے سردیوں کی خاص سوغات کہا جاتا ہے۔ کیونکہ موسم سرما کی آمد کے ساتھ ہی انجیر مختلف جگہوں پر دکھائی دیتی ہیں۔

انجیر کمزور افراد کے لیے ایک بیش بہا نعمت ہے، اس کا باقاعدگی سے استعمال کمزور افراد کو فربہ بناتا ہے۔

یہ سانس کے امراض کے لیے بھی ایک بہترین دوا ہے ، یہ جسم میں انسولین کی مزاحمت کو کم کرتی ہے اس طرح خون میں چینی سطح اعتدال میں رہتی ہے۔

ایسے افراد جن میں سیلینیئم نامی مرکب کی کمی ہو جاتی ہے ان میں میٹھا کھانے کی طلب بڑھ جاتی ہے، انجیر میں سیلینیئم پایا جاتا ہے، اس کا باقاعدہ استعمال میٹھے کی طلب سے چھٹکارا دلانے میں اہم کردار ادا کرسکتا ہے۔

انجیرمیں فائبر کافی مقدار میں موجود ہوتا ہے اسی لیے یہ نظام انہضام کو بہتر بنانے میں معان ثابت ہوتی ہے۔

پکی ہوئی انجیر پولی فینول سے بھری ہوتی ہے، یہ ایک طرح کا اینٹی آکسیڈنٹ ہے جو فری ریڈیکل سے بچانے میں مدد فراہم کرتا ہے۔

انجیر پوٹاشیئم سے بھرپور ہونے کی بنا پر بلڈ پریشر کو بھی توازن میں رکھنے میں معاون ثابت ہوتی ہے۔

Comments

یہ بھی پڑھیں