The news is by your side.

Advertisement

بنگال ٹائیگر کی کار سواروں کو کار سمیت جنگل میں لے جانے کی کوشش (دل دہلا دینے والی ویڈیو)

بنگلور: بھارتی شہر بنگلور کے سفاری پارک میں کار سواروں کو بنگال ٹائیگر کا سامنا مہنگا پڑ گیا، بڑی جسامت کے خوف ناک ٹائیگر نے کار سواروں کو کار سمیت جنگل میں گھسیٹ کر لے جانے کی کوشش کی۔

تفصیلات کے مطابق بنگلور کے بینر گھٹا نیشنل پارک میں سیر و تفریح کے لیے آنے والوں کو اس وقت دہشت ناک لمحوں کا سامنا کرنا پڑا جب ایک بڑی جسامت کے بنگال ٹائیگر نے ان کی گاڑی کے بمپر کو اپنے مضبوط دانتوں میں پکڑ کر گاڑی کو کھینچنا شروع کر دیا۔

گاڑی میں چار افراد بیٹھے ہوئے تھے جو بنگال ٹائیگر کو اپنے قریب چہل قدمی دیکھتے ہوئے محظوظ ہو رہے تھے، لیکن پھر وہ ہوا جس نے ان کی چیخیں نکال دیں، ٹائیگر نے گاڑی کو بمپر سے پکڑ کر کھینچنا شروع کر دیا۔

ٹائیگر نے گاڑی کے بمپر کو پھاڑنے کی کوشش کی اور اپنے مضبوط جبڑوں میں پکڑ کر 1.8 ٹن کی گاڑی کو پیچھے کھینچ لیا، یہ دیکھ کر گاڑی کے اندر بیٹھے چار افراد خوف سے چیخنے لگے۔

اس واقعے کی ناقابل یقین فوٹیج میں دیکھا جا سکتا ہے کہ ٹائیگر اتنی بھاری گاڑی کو گھسیٹ رہا ہے، اور اس سے قبل اس نے بمپر میں دانت گاڑ کر اسے چیرنے کی کوشش کی تھی، اور وہ اپنی جگہ سے اکھڑ گیا تھا۔

آس پاس کی گاڑیوں میں بیٹھے افراد نے اس حیرت انگیز منظر کو بہت دل چسپی سے دیکھا، تاہم اس موقع پر گاڑی کے ڈرائیور نے عقل مندی دکھائی اور گاڑی کو بھگا کر لے جانے کی کوشش نہیں کی، ورنہ ٹائیگر زخمی بھی ہو سکتا تھا۔

واضح رہے کہ ایک جوان رائل بنگال ٹائیگر کا وزن 30 ٹن تک جا سکتا ہے اور اس کی لمبائی 9 فٹ تک ہوتی ہے، اور ان کے دانت 4 انچ تک لمبے ہوتے ہیں، اور ان کے بڑے پنجے بتاتے ہیں کہ یہ درختوں پر بھی آسانی سے چڑھ سکتے ہیں۔

Comments

یہ بھی پڑھیں