کوئٹہ: ذرایع کا کہنا ہے کہ پاکستان مسلم لیگ ن بلوچستان کے صدر عبدالقادر بلوچ نے مستعفی ہونے کا فیصلہ کر لیا ہے۔
تفصیلات کے مطابق ن لیگ بلوچستان کے صدر استعفیٰ دے رہے ہیں، عبدالقادر بلوچ ثنا اللہ زہری کو پی ڈی ایم کوئٹہ جلسے میں نہ بلانے پرمستعفی ہو رہے ہیں۔
عبدالقادر بلوچ مستعفی ہونے سے متعلق اعلان پریس کانفرنس میں کریں گے، ذرایع نے بتایا کہ شاہد خاقان نے ثنااللہ زہری کو جلسے میں مدعو کرنے سے انکار کر دیا تھا۔
پارٹی کا مؤقف ہے کہ ثنااللہ زہری ڈھائی سال سے ملک میں نہیں، اس لیے جلسے کا حصہ نہیں بن سکتے، جب کہ نواز شریف کے منع کرنے کے باوجود ثنااللہ زہری نے وزارت اعلیٰ بلوچستان سے استعفیٰ بھی دیا تھا۔
کہا گیا کہ ثنااللہ زہری تحریک کے ساتھ ہی نہیں ہیں تو پھر انھیں جلسے میں کیوں بلایا جائے؟
خیال رہے کہ عبدالقادر بلوچ نواز شریف کی کابینہ میں وفاقی وزیر بھی رہ چکے ہیں۔ دوسری طرف یہ بات سامنے آئی ہے کہ طرف ثنااللہ زہری کو جلسے میں نہ بلانے کا فیصلہ ن لیگی اعلیٰ قیادت اور پارٹی نے مشترکہ طور پر کیا تھا۔
احسن اقبال نے صورت حال پر تبصرہ کرتے ہوئے کہا کہ کوئٹہ کے جلسے میں کچھ مقامی افراد کا نقطہ نظر مختلف تھا، اختر مینگل اور ثنااللہ زہری کے درمیان تنازع ہے، ان کے تنازع کے باعث جلسے میں شرکت سے روکا گیا۔
