کوٹلی: آزاد کشمیر کے علاقے تتہ پانی سیکٹر پر مقامی افراد نے چیتے کے جسامت کی جنگلی بلی کو پکڑ کر محکمہ وائلڈ لائف کے حوالے کردیا جس نے حملہ کر کے تین لوگوں کو زخمی کردیا تھا۔
تفصیلات کے مطابق آزاد کشمیر سے تعلق رکھنے والے صارف نے سماجی رابطے کی ویب سائٹ پر جنگلی بلی کی تصویر شیئر کی جس کے ساتھ انہوں نے لکھا کہ چیتے کے برابر جنگلی بلی نے تتہ پانی کے علاقے میں مکینوں پر حملہ کیا۔
اطلاعات کے مطابق مکینوں نے اپنی مدد آپ کے تحت بلی کو زخمی کیا اور اُسے پکڑ لیا، لوگوں کو جب اس بات کی اطلاع ملی تو وہ اس کی تصاویر بنانے کے لیے پہنچ گئے اور اسے دیکھ کر ورطہ حیرت میں بھی مبتلا ہوئے۔
ایک اور صارف نے چیتے نما بلی کی ویڈیو شیئر کی جس میں دیکھا جاسکتا ہے کہ اُسے گاڑی میں پٹے کے ساتھ باندھ کر کسی دوسرے مقام پر لے جایا جارہا ہے۔ علاقہ مکینوں نے اپنی مدد آپ کے تحت جنگلی بلی کو محکمہ وائلڈ لائف کے حوالے کردیا جس کے بعد اسے آزاد کشمیر کے علاقے کوٹلی لے جایا گیا۔
Video: Big cat leopard detained by locals in Tatta Pani (Hot Spring) area, Azad Kashmir, after it allegedly attacked a neighborhood and injured 3 people, the animal has now been shifted to Kotli pic.twitter.com/nNKnuzVssA
— Khalid khi (@khalid_pk) March 28, 2018
واضح رہے کہ آزاد کشمیر کے مختلف علاقے جہاں پہاڑی سلسلے ہیں وہاں اکثر جنگلی جانور عوام کو نظر آتے ہیں اور بعض اوقات تو وہ بھوک کے عالم میں مکینوں کو نقصان تک پہنچا دیتے ہیں۔
پاکستان میں موجود پہاڑی علاقوں میں سرسبز و شاداب جنگلات جنگلی جانوروں، پرندوں کا بہترین ٹھکانہ تصور کیے جاتے ہیں، اس ضمن میں محکمہ وائلڈ لائف کا کہنا ہے کہ اس بلی کی موجودگی کی طرح نایاب جانور جنگلات میں موجود ہیں جو وقتاً فوقتاً نظر آتے ہیں۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
