کراچی میں سرکاری افسر کے گھر میں ڈکیتی کی بڑی واردات ہوئی ہے، ڈاکو کروڑوں روپے نقدی اور طلائی زیورات لوٹ کر لے گئے۔
اے آر وائی نیوز کے مطابق کراچی کے علاقے کے علاقے ملیر شاہ لطیف اسسٹنٹ فوڈ کنٹرولر کے گھر میں گزشتہ شب ڈاکو دھڑلے سے داخل ہوئے اور کروڑوں روپے نقدی، زیورات لوٹ کر فرار ہوگئے، پولیس نے سکندر علی کی مدعیت میں مقدمہ درج کرلیا ہے۔
مدعی سکندر علی کا موقف ہے کہ گزشتہ رات پونے بارہ بجے وہ گھر کا دروازہ کھول کر گاڑی پارک کر رہا تھا کہ اچانک دو مسلح ملزمان اندر داخل ہوگئے، ایک ملزم نے میرے سر پر پستول رکھ کر اندر جانے کا کہا اور بات نہ ماننے کی صورت میں جان سے مارنے کی دھمکی دی۔
سکندر کے مطابق ملزمان بزور اسلحہ گھر میں داخل ہوئے اور مجھ سمیت تمام گھر والوں کو ایک کمرے میں بند کرکے لوٹ مار شروع کردی۔
ایف آئی آر کے مطابق ڈاکوؤں نے ڈھائی کروڑ روپے مالیت سے زائد کی ڈکیتی ماری، ملزمان الماری میں رکھے ایک کروڑ 70 لاکھ روپے کے علاوہ 20 لاکھ روپے کے پرائز بانڈ اور 55 تولا سونا لوٹ کر فرار ہوگئے۔
