تلنگانہ : بھارت میں موٹرسائیکل سوار سے لفٹ مانگ کر اسے قتل کرنے والے ملزمان کو پولیس نے ڈرامائی انداز میں حراست میں لے لیا، جنہوں نے اہم انکشافات کیے ہیں۔
بھارتی میڈیا کے مطابق قتل کی اس واردات میں مقتول کی بیوی خود ملوث تھی، پولیس نے ملزمان کو ابتدائی تحقیقات میں ہی جانچ لیا تھا۔
تلنگانہ پولیس نے موٹرسائیکل پر لفٹ لینے کے بعد زہریلا انجکشن لگا کر سنسنی خیز قتل کے محرکات کا پتہ لگا لیا جس نے سننے والوں کو بھی حیران کردیا۔
پولیس کے مطابق 55 سالہ شیخ جمال نامی کسان 19 ستمبر کو اپنی بیٹی کے گھر سے اپنی اہلیہ کو لینے کیلئے موٹر سائیکل پرآندھرا پردیش کے گاؤں جا رہا تھا کہ راستے میں ٹوپی پہنے ایک اجنبی نے لفٹ مانگی جس پر اس نے اجنبی کو بٹھالیا۔
دو میں سے ایک شخص جمال کی موٹر سائیکل پر بیٹھ گیا کچھ دور جانے کے بعد پیچھے بیٹھے شخص نے جمال کی پیٹھ پر کوئی نوکیلی چیز چبھوئی۔
انجکشن لگتے ہی جمال کو چکر آنے لگے تو اس نے موٹر سائیکل روک دی۔ جمال نے اس شخص سے پوچھنے کی کوشش کی کہ وہ کون ہے اور اس نے ایسا کیوں کیا؟
اسی دوران ملزم پیچھے سے دوسری موٹر سائیکل پر آنے والے ساتھی کے ساتھ بیٹھ کر فرار ہوگیا اور جمال زیادہ چکر آنے کی وجہ سے وہیں گرگیا۔
اتفاق سے کچھ دیر میں آس پاس لوگ جمع ہوگئے تو جمال نے غنودگی کے عالم میں ساری تفصیل بتائی، بعد ازاں جمال کے کہنے پر اسے پانی پلایا جسے پینے کے بعد جمال کی حالت مزید خراب ہوگئی اور وہ بے ہوش ہوگیا۔
جمال کو فوری طور پر قریبی اسپتال لے جایا گیا لیکن وہ اسپتال پہنچنے سے قبل ہی دم توڑ چکا تھا جس کی تصدیق اسپتال کے ڈاکٹروں نے کردی۔
بھارتی میڈیا کے مطابق ابتدائی تحقیقات میں چونکا دینے والی تفصیلات کا انکشاف ہوا اور آٹو رکشا ڈرائیور موہن راؤ، ٹریکٹر ڈرائیور وینکٹیش اور ایک ڈاکٹر وینکٹ کی گرفتاری عمل میں آئی۔ ڈاکٹر نے زہریلے انجکشن کا انتظام کیا تھا۔
پولیس کا کہنا ہے کہ مقتول کی بیوی امام بی نے ہی قتل کی منصوبہ بندی کی تھی جس نے تقریباً دو ماہ قبل بھی جمال کو زہریلا انجکشن لگانے کی کوشش کی تھی جس میں اسے ناکامی کا سامنا کرنا پڑا تھا۔
مزید پڑھیں : لفٹ مانگنے والے نے موٹرسائیکل سوار کو زہریلا انجکشن لگا دیا
بعد ازاں ملزمہ نے اپنے دوست سے اس منصوبے پر عمل کرنے کو کہا ملزمہ کے مطابق موہن راؤ نے موٹر سائیکل پر لفٹ لینے کے بعد جمال کو وہی انجکشن لگایا۔
