کراچی: پی ٹی آئی رکن سندھ اسمبلی بلال غفار نے بھی پارٹی اور سیاست چھوڑنے کا اعلان کردیا۔
اے آر وائی نیوز کے مطابق کراچی سے پی ٹی آئی رکن اسمبلی بلال غفار نے ویڈیو بیان میں کہا کہ فیصلہ کیا ہے کہ پی ٹی آئی سے استعفیٰ دیتا ہوں، کسی پارٹی میں نہیں جاؤں گا میں سیاست چھوڑنے کا اعلان کررہا ہوں۔
انہوں نے کہا کہ پاکستان کے لیے اپنا مثبت کردار ادا کرتا رہوں گا انشا اللہ پاکستان ترقی کرے گا۔
بلال غفار نے کہا کہ 9 مئی کے واقعات کی مذمت کرتا ہوں، یادگار شہدا، فوجی تنصیبات پر حملوں کی جتنی مذمت کی جائے کم ہے، بحیثیت پاکستانی سوچ بھی نہیں سکتا کہ اداروں اور ملک کو نقصان پہنچایا جائے۔
انہوں نے کہا کہ پاک فوج ایک اہم ادارہ ہے اور اس کی بہت قربانیاں ہیں، پاک فوج نے ملک کی خدمت کی اور بہت زیادہ قربانیاں دی ہیں۔
بلال غفار نے کہا کہ سیاست میں ایسے واقعات نہیں ہونے چاہئیں، 9 مئی کے واقعات کی انکوائری کی جائے اور ذمہ داروں کو سزا دی جائے۔
